चाईबासा ।
पश्चिमी सिंहभूम जिलाक अति नक्सल प्रभावित क्षेत्र सारंडा वनक्षेत्र मे शुक्र दिन सीआरपीएफक कोबरा बटालियनक दू जवान आइईडी विस्फोट मे घायल भए गेल। ई विस्फोट नक्सली द्वारा पूर्वसिद्ध रूप सं बिछाओल गेल आइईडी कें कारण भेल, जाहि मे सर्च अभियानक दौरान हिंदूकोचा गाम लग जवान सभ विस्फोटक चपेट मे आबि गेलाह।
घटना उपरांत दुर्गम जंगल सं दूनू घायलक सुरक्षित निकालि एयरलिफ्ट सं रांची स्थित अस्पताल मे पठाओल गेल अछि, जतय हुनकर उपचार चलि रहल अछि।
जिलाक पुलिस आ सीआरपीएफ द्वारा भाकपा (माओवादी) उग्रवादिक विरुद्ध संयुक्त अभियान लगातार चलाओल जा रहल अछि। एहि क्रम मे सुरक्षाबल सारंडा क्षेत्रक भीतर सघन तलाशी अभियान चला रहल छल, जाहि बीच ई विस्फोटक घटना घटल।
ई उल्लेखनीय अछि जे एक दिन पूर्वो नक्सली द्वारा करमपदा-रेंगड़ा रेलमार्ग पर पोस्टर-बैनर लगा क’ रेल परिचालन बाधित कएल गेल छल। ओहि क्षेत्र मे पेट्रोलिंग करि रहल रेलवे ट्रैकक एक कीमैन आइईडी विस्फोटक चपेट मे आबि घायल भेल छलाह, जखन कि एक ट्रैकमैनक मृत्यु भ’ गेल छल।
सारंडा जंगल मे माओवादी शीर्ष नेतृत्वक मौजूदगीक ठोस सूचना सुरक्षाबल कें प्राप्त भेल अछि। एहि सूची मे मिसिर बेसरा, अनमोल, मोछु, अनल, असीम मंडल, अजय महतो, सागेन, अंगरिया, अश्विन, पिंटू लोहार, चंदन लोहार, अमित हांसदा उर्फ अपटन, जयकांत, रापा मुंडा आदि शामिल छथि, जे अपन-अपन दस्ता संग सक्रिय रूपेण भ्रमणशील छथि।
सूत्रक अनुसार नक्सली सभ सारंडा क्षेत्रक विभिन्न ठाम पर आइईडी बिछा रखने छथि, जे सामान्य दबाव पड़िते विस्फोट करैत अछि। एहि प्रकारक रणनीति सं ओ सभ सुरक्षाबलक गतिविधिकें बाधित करबाक प्रयास क’ रहल छथि। एहन विस्फोटक चपेट मे आबि पहिने सेहो कतेको जवान अपन प्राण गमा चुकल छथि।
