विभिन्न क्षेत्र मे भ’ रहल हत्या पर चिंता व्यक्त कयलनि
भारतीय कांग्रेस समिति के प्रवक्ता आ बिहार विधान परिषद के पूर्व सदस्य प्रेमचंद मिश्र जिला कांग्रेस कार्यालय ललित भवन मे पत्रकार के संबोधित कयलनि। अपन संबोधन मे ओ कहला जे वर्तमान राज्य सरकार अपराध पर नियंत्रण करबा मे पूर्ण रूप सं असफल अछि। आइ पूरा राज्य मे कानून व्यवस्था के स्थिति खराब अछि। मधुबनी सं पटना तक आम आदमी सुरक्षित नहि अछि। हमर महागठबंधन के हिस्सेदार आ वीआईपी सुप्रीमो मुकेश सहनी के पिता के हत्या कानून व्यवस्था पर बहुत रास सवाल ठाढ़ क’ रहल अछि।
मधुबनी के झंझारपुर शहर बेनीपट्टी सहित विभिन्न क्षेत्र मे भ’ रहल हत्या पर ओ चिंता व्यक्त करैत सरकार सँ अपराध नियंत्रण के संबंध मे ठोस निर्णय लेबाक मांग कयलनि। कहलनि विपक्ष रचनात्मक सहयोग के लेल पूर्ण रूप सं तैयार अछि।ओ मधुबनी मे उठल जल संकट पर चिंता व्यक्त करैत कहला जे जाहि तरहे पोखरि भरब आ बेचल जा रहल अछि ओ भविष्य लेल भयावह स्थिति के आमंत्रित क’ रहल अछि।
ओ जल नल योजना पर सेहो बहुत रास सवाल उठेलथि। एहि दौरान जिला कांग्रेस समिति के अध्यक्ष मनोज कुमार मिश्र, बिहार किसान कांग्रेस अध्यक्ष हिमांशु कुमार, उप मेयर अमानुल्लाह खान मीना देवी कुशवाहा, नगर अध्यक्ष अविनाश कुमार झा, उदय चंद्र झा ललन, विवेकानंद झा, टेक नाथ पाठक, अब्दुल हाशिम, रणधीर सिंह, नित्यानंद झा आदि उपस्थित रहथि।
