पटना। पटना स्थित पारस अस्पताल मे चंदन मिश्रा हत्याकांडक संदर्भ मे पुलिस एक बेर फेर पैघ कार्रवाई केलक अछि। एहि मामिलाक आरोपित सभक गिरफ्तारी लेल आरा जिलाक बिहिया इलाकामे पुलिस आ स्पेशल टास्क फोर्स (एसटीएफ) द्वारा संयुक्त छापामारी अभियान चलाओल गेल। अभियानक क्रममे बिहिया–कंटेया पथ पर नदीक समीप जखन अपराधी सभ पुलिसक उपस्थिति देखलक, तखन ओ लोकनि ताबड़तोड़ फायरिंग शुरू कएलक। पुलिस सेहो त्वरित प्रत्युत्तर देलक, जाहिमे दू गोट अपराधी गोली लगलाक कारण घायल भए गेल।
दोसर दिस, पुलिस एहि मुठभेड़क क्रममे अभिषेक कुमार नामक एक तेसर आरोपी के सेहो गिरफ्तार केलक। प्रारंभिक पूछताछमे अभिषेक ई स्वीकार केलक जे ओ पारस अस्पताल मे भेल चंदन मिश्रा हत्याकांड मे अन्य अपराधी सभक संग संलिप्त छल। घायल दू अपराधीक गिरफ्तारी सं पूछ–ताछ आ अग्रिम कार्रवाईक क्रम आर तेज होयबाक संभावना अछि। पुलिस एहि समस्त घटनाक श्रृंखला मे अपराधी संजालक पर्दाफाश करबाक दिशा मे तेजी सं प्रयासरत अछि।
