– दुबई स्थित एक शिपिंग कंपनी कप्तानक रूप मे कार्यरत छलाह अमृत झा
– ईरानक बंदरगाह बंदर अब्बास सं अबैत काल ईरानी सेना जहाज पर कए लेलक नियंत्रण
नेपालक नागरिक अमृत झा, जे नेपालक कोसी प्रदेशक उदयपुर (गायघाट) सं छथि, ईरानी सुरक्षा बल द्वारा हॉर्मुज़ समुद्री मार्ग मे एक कार्गो जहाजक यात्राक दौरान गिरफ्तार कएल गेलाह। ओ जहाज पर ईंधन लोड कएलाक बाद आबि रहल छलाह। बताओल जाइत अछि जे ईरानक बंदरगाह बंदर अब्बास सं वापसी पर ईरानी रिवोल्यूशनरी गार्ड (सेना) द्वारा जहाज पर नियंत्रण कएल गेल आ समस्त क्रू केर सदस्यक संग अमृत झा कें सेहो हिरासत मे लेल गेल।
अमृत झा 33 वर्षक छथि आ दुबई स्थित एक शिपिंग कंपनी लेल कप्तानक रूप मे काज करैत छथि। तनावक बीच ओ तेल ढुलाइक काज पर छलाह आ लौटैत समय ईरानी सुरक्षा बलक हाथ लागि गेलाह। परिवारक कथनक अनुसार गिरफ्तारीक किछु दिन बाद धरि हमरा सभ कें अमृत झा सं कोनो संपर्क नहि भेल। फेर एक दिन व्ह्वाट्सऐप पर वॉयस मैसेज आयल। एहि मैसेज मे ओ कहलनि जे ईरानी सुरक्षा कर्मी सभ हमरा आ दू अन्य भारतीय नागरिक कें सेहो गिरफ्तार कए लेने अछि।
बाद मे नेपालक विदेश मंत्रालय सेहो एहि आरोपके पुष्टि कएलक जे अमृत झा ईरानी सेनाक हिरासत मे छथि, मुदा कोन दिन आ कोन कारण सं गिरफ्तारी भेल ई स्पष्ट नहि अछि। मंत्रालय कहलक जे ओ काठमांडू स्थित ईरानक दूतावास आ कतार स्थित नेपालक दूतावासक माध्यम सं स्थिति जानबाक लेल संपर्क स्थापित कए रहल अछि।
जांच मे इहो पता चलल जे जहाज पर कुल सात चालक दलक सदस्य छलाह, जाहि मे चारि कें बाद मे छोड़ि देल गेल मुदा अमृत झा आ दू अन्य भारतीय नागरिक अखनहुं ईरानी हिरासत मे छथि। गिरफ्तारीक ठोस कारण सरकारी रूप सं घोषित नहि भेल अछि आ ईरानी पक्ष द्वारा आधिकारिक स्पष्टीकरण सेहो उपलब्ध नहि कएल गेल अछि।
नेपाल सरकार तेज केलक डिप्लोमेटिक प्रयास
नेपाल सरकार तुरन्त अमृत झाक स्थिति बुझबाक लेल आ हुनक रिहाई लेल डिप्लोमैटिक प्रयास तेज कए देलक अछि। विदेश मंत्रालयक अधिकारी लोकनि स्थितिक जांच कए रहल छथि आ नेपालक मानद कौंसल आ कतर मे स्थित नेपाली दूतावासक माध्यम सं व्यवस्था कए रहल छथि जे परिवारक संग संपर्क स्थापित भए सकय आ हुनक मामिला पर संवाद जारी रहय। मुदा एखन धरि कोनो अंतिम समाधान नहि आयल अछि।
अमृत झा संग दू भारतीय नागरिक सेहो छथि ईरानक हिरासत मे
अमृत झा संग गिरफ्तार दू टा भारतीय नागरिकक नाम आ परिचय सार्वजनिक रूप सं सामने नहि आयल अछि। समाचार मे मात्र बताओल गेल अछि जे ईरानक हिरासत मे तीन विदेशी (एक नेपाली आ दू भारतीय) अखनहुं बंद छथि। एतबा ज्ञात अछि जे चारि अन्य चालक दलक सदस्य सुविधा अनुसार मुक्त कएल गेलाह।
संवेदनशील बनि गेल अछि हॉर्मुज जलडमरुमध्य
हॉर्मुज समुद्री मार्ग विश्वक एकटा अत्यंत संवेदनशील जलडमरुमार्ग अछि, जतय अमेरिका, इजरायल आ ईरानक बीच तनावक बीच अनिश्चितताक स्थिति अछि। एहन स्थिति मे जहाजक यात्राक दौरान सुरक्षा बलक हस्तक्षेप आ कैदक घटना बढ़ैत तनावक परिणाम मानल जा रहल अछि। अमृत झा जे शिपक कप्तान छथि, हुनका ईरानक सुरक्षा बल हिरासत मे लेलक अछि आ ईरान, भारत आ नेपालक बीच कूटनीतिक संवाद चलि रहल अछि, मुदा रिहाई आ गिरफ्तारीक औपचारिक कारण पर स्पष्टता नहि आयल अछि। ई मामिला वर्तमान मध्य पूर्व तनावक पृष्ठभूमि मे देखल जा रहल अछि।
