– 12 घंटा मे दोसर बेर नीतीश कुमार सं भेंट करबाक लेल मुख्यमंत्री आवास पहुंचलाह डिप्टी सीएम सम्राट चौधरी
पटना, समदिया
बिहार मे नव सरकारक गठन कें लए कए राजनीतिक हलचल तेज भए गेल अछि। मुख्यमंत्री नीतीश कुमार 14 अप्रैल कें कैबिनेटक अंतिम बैठक करताह, एहन संभावना जताओल जा रहल अछि। ओही दिन ओ मुख्यमंत्री पद सं इस्तीफा सेहो दए सकैत छथि। एहि बीच केंद्रीय मंत्री शिवराज सिंह चौहान कें पर्यवेक्षक (ऑब्जर्वर) बनाओल गेल अछि। सूत्र सभक अनुसार, 15 अप्रैल कें शिवराज सिंह नव मुख्यमंत्रीक चेहराक घोषणा करताह। दोसर दिस, सम्राट चौधरी 12 घंटा मे दोसर बेर नीतीश कुमार सं भेंट करबाक लेल मुख्यमंत्री आवास पहुंचलथि। हुनका संग विजय चौधरी सेहो छलथि। तीनू गोटेक बीच लगभग 20 मिनट धरि बात भेल।
बैठकक बाद मंत्री विजय चौधरी मुख्यमंत्रीक चेहराक संबंध मे कहलनि जे ई तं बीजेपी तय करत, तकर बाद एनडीए बैठक मे सहमति बनत। संजय झा सेहो मुख्यमंत्री सं भेंट करबाक लेल पहुंचलथि। 14 अप्रैल कें सरकारक अंतिम कैबिनेट बैठक होएबाक संभावना अछि। 10 अप्रैल कें नीतीश कुमार राज्यसभा सांसदक रूप मे शपथ लेने छथि। यद्यपि 14 अप्रैलक बैठकक संबंध मे अखन धरि कोनो आधिकारिक पुष्टि नहि भेल अछि।
14 अप्रैल कें मुख्यमंत्री नीतीश कुमार राज्यपाल कें अपन इस्तीफा सौंपि सकैत छथि। तकर बाद एनडीए विधायक दलक बैठक होएत, जाहि मे नव नेता चुनल जाएत। एकर बाद 15 अप्रैल कें नव सरकारक शपथ ग्रहण कार्यक्रम प्रस्तावित अछि। नव मुख्यमंत्रीक संग आधा दर्जन मंत्री सेहो शपथ लेताह। ई शपथ राज्यपाल सैयद अता हसनैनक उपस्थिति मे लोक भवन मे होएबाक संभावना अछि। यद्यपि एखन धरि कोनो आधिकारिक घोषणा नहि भेल अछि, मुदा सभ विभागक अधिकारी सभ कें सतर्क कए देल गेल अछि।
शनि दिन बिहारक दुनू उपमुख्यमंत्री सांझ 5:30 बजे अचानक मुख्यमंत्री आवास पहुंचलथि। हुनका संग मंत्री लखेंद्र पासवान सेहो छलथि। लगभग 30 मिनट धरि सभक नीतीश कुमार सं भेंट-वार्ता भेल। बाद मे कहल गेल जे शीघ्र सभ किछु स्पष्ट भए जाएत आ बिहार मे जे किछु होएत, से नीतीश कुमारक नेतृत्व मे होएत। दोसर दिस, नीतीश कुमार सं भेंटक बाद उपमुख्यमंत्री विजय सिन्हा लोक भवन गेलथि, जतय ओ लगभग 30 मिनट रहलथि।
एहि सं पहिने शनि दिन भोर जेडीयू नेता सभ कार्यकारी अध्यक्ष संजय झा आ मंत्री विजय चौधरी, मुख्यमंत्री सं भेंट करबाक लेल पहुंचल रहथि। लगभग 2 घंटा धरि बैठक चलल, जाहि मे नव मंत्रिमंडलक स्वरूप आ युवा लोकनि कें स्थान देबाक विषय पर विचार-विमर्श भेल।
एहि बीच केंद्रीय मंत्री चिराग पासवान स्पष्ट कहलनि जे ओ मुख्यमंत्री पदक दौड़ मे नहि छथि। हुनकर कथन छल जे सरकारक चेहरा बदलत, मुदा सूत्र ओहिना रहत। दिल्ली मे भाजपाक राष्ट्रीय अध्यक्ष नितिन नवीन आ केंद्रीय गृहमंत्री अमित शाहक बीच सेहो महत्वपूर्ण बैठक भेल। सूत्र सभक अनुसार, एहि बैठक मे बिहारक वर्तमान राजनीतिक स्थिति पर चर्चा कएल गेल।
शुक्र दिन नीतीश कुमार राज्यसभा सांसदक रूप मे शपथ ग्रहण कएलनि। उपराष्ट्रपति सी.पी. राधाकृष्णन हुनका शपथ दियौलनि। एहि अवसर पर बिहार एनडीएक अनेक नेता उपस्थित छलथि। एकर संगहि नीतीश कुमार एकटा विशिष्ट उपलब्धि सेहो हासिल कएलनि। ओ देशक ओहि चुनिंदा नेता सभ मे सम्मिलित भए गेल छथि, जे लोकसभा, राज्यसभा, बिहार विधानसभा आ विधान परिषद – चारू सदनक सदस्य रहल छथि। राज्यसभा मे ई हुनकर पहिल कार्यकाल अछि।
