– जवाबी हमला मे 400 मिसाइल दगलक ईरान, दुबई मे अमरीका रडार केलक ध्वस्त
तेहरान, एजेंसी
इजरायल द्वारा शनिदिन भोर ईरानक राजधानी तेहरान सहित अनेक नगर पर व्यापक सैन्य आक्रमण कएल गेल। ईरानी समाचार संस्था सभक अनुसार दक्षिणी ईरानक एक विद्यालय पर मिसाइल खसला सं 40 छात्राक मृत्यु भए गेल, जखनकि 45 अन्य घायल छथि। ई घटना सं समूचा क्षेत्र मे शोक आ तनावक वातावरण व्याप्त अछि।
अमेरिका आ इजरायल एहि कार्रवाई कें संयुक्त सैन्य अभियान घोषित कएने अछि। अमेरिका राष्ट्रपति डोनाल्ड ट्रम्प एक वीडियो संदेश जारी कए कहलनि जे ईरान पर ई आक्रमण अमेरिकी नागरिक सभक सुरक्षा सुनिश्चित करबाक उद्देश्य सं कएल गेल अछि। हुनकर कथन अनुसार अमेरिकी सेना ईरानक मिसाइल भंडार कें निष्प्रभावी करबाक आ ओकर मिसाइल कार्यक्रम समाप्त करबाक प्रयास कए रहल अछि।
प्रत्युत्तर मे ईरान इजरायल पर लगभग 400 मिसाइल प्रक्षेपित कएलक। संगहि कतर, कुवैत, जॉर्डन, बहरीन, सऊदी अरब आ संयुक्त अरब अमीरात मे स्थित अमेरिकी सैन्य ठिकाना सभ कें सेहो लक्ष्य बनाओल गेल। संयुक्त अरब अमीरातक सर्वाधिक जनसंख्या वाला नगर दुबई पर सेहो मिसाइल प्रहार कएल गेल। एहि घटनाक्रम सं समूचा मध्य-पूर्व क्षेत्र मे तनाव अत्यधिक बढ़ि गेल अछि।
इजरायल ईरान विरुद्ध अपन नव सैन्य अभियानक नाम लियोन्स रोर (सिंहक गर्जना) घोषित कएने अछि। ई आक्रमण ईरान आ अमेरिका बीच परमाणु अस्त्र कार्यक्रम संबंधी वार्ता चलैत काल मे सम्पन्न भेल अछि। हालहि मे राष्ट्रपति ट्रम्प ईरान पर आक्रमणक चेतावनी देने छलाह।
ईरान आ अमेरिका बीच परमाणु समझौता वार्ता मे बैलिस्टिक मिसाइल परियोजना प्रमुख विवादक विषय बनल अछि। ईरान स्पष्ट कएने अछि जे मिसाइल कार्यक्रम ओकर लाल रेखा अछि आ एहि पर कोनो प्रकारक समझौता स्वीकार्य नहि होएत। ईरानक कथन अनुसार ओकर बैलिस्टिक मिसाइल कार्यक्रम राष्ट्रीय सुरक्षा लेल अनिवार्य अछि। जून 2025 मे इजरायल आ अमेरिका द्वारा ईरानक परमाणु स्थलक ऊपर कएल गेल आक्रमणक समय ईरानक मिसाइल प्रणाली ओकर रक्षा मे सहायक सिद्ध भेल छल। अतः ईरानी अधिकारी सभ बारंबार स्पष्ट कए चुकल छथि जे वार्ता मात्र परमाणु कार्यक्रम धरि सीमित रहत, मिसाइल अथवा क्षेत्रीय गुट सभ पर नहि।
इजरायली आक्रमण मे ईरान कें उल्लेखनीय क्षति पहुंचल अछि। समाचार संस्था रॉयटर्सक अनुसार ईरानक रक्षा मंत्री अमीर नसीरजादेह आ रिवोल्यूशनरी गार्ड्सक कमांडर मोहम्मद पाकपोर आक्रमण मे मृत भए गेल छथि। यद्यपि एहि विषय मे ईरान सरकार द्वारा आधिकारिक पुष्टि अखन धरि नहि कएल गेल अछि, तथापि एहि समाचार सं क्षेत्रीय अस्थिरता आओर गहन भए गेल अछि।
अयातुल्ला खामनेईक आवासीय परिसर भेल धुआं-धुआं
उपग्रह चित्र सभ मे ईरानक सर्वोच्च नेता अयातुल्ला अली खामेनेईक सुरक्षित परिसर पर ताजा आक्रमणक चिन्ह देखायल गेल अछि। न्यूयॉर्क टाइम्स द्वारा प्रकाशित आ एयरबस द्वारा ग्रहण कएल गेल फोटो मे तेहरान स्थित परिसरक ऊपर घनगर धुआं उठैत आ अनेक भवन ध्वस्त अवस्था मे देखा रहल अछि। अनेक सैन्य स्थलक, मिसाइल उत्पादन केंद्र आ सर्वोच्च नेताक कार्यालय समीपवर्ती क्षेत्र कें लक्ष्य बनाओल गेल। न्यूयॉर्क टाइम्सक अनुसार वर्तमान समय मे खामेनेईक ठिकानाक स्पष्ट जानकारी उपलब्ध नहि अछि।
एक इजरायली अधिकारी रॉयटर्स कें जनाओलक जे संयुक्त अभियान दौरान अयातुल्ला अली खामेनेई आ ईरानी राष्ट्रपति मसूद पेजेशकियन पर सेहो प्रहार कएल गेल, परंतु परिणाम स्पष्ट नहि अछि। राष्ट्रपति ट्रम्प ट्रुथ सोशल पर लिखलनि जे अमेरिकी सैन्य अभियान व्यापक आ निरंतर जारी अछि। हुनका अनुसार अनेक अमेरिकी नागरिकक जीवन संकट मे पड़ि सकैत अछि। ओ ईरानी सुरक्षा बल आ पुलिसक सदस्य सभ सं हथियार त्याग करबाक आ आत्मसमर्पण करबाक आह्वान कएलनि, अन्यथा कठोर परिणाम भुगतबाक चेतावनी देलनि।
बाक्स
संवाद सं निकालल जाय रस्ता : भारत
ईरान पर कएल गेल आक्रमण सं भारत सरकार गंभीर चिंता व्यक्त कएने अछि। विदेश मंत्रालय द्वारा जारी वक्तव्य मे कहल गेल अछि जे भारत ईरान आ खाड़ी क्षेत्र मे हालक घटनाक्रम सं अत्यंत चिंतित अछि। सभ पक्ष सं संयम बरतबाक, तनाव कम करबाक आ नागरिकक सुरक्षा कें प्राथमिकता देबाक आग्रह कएल गेल अछि। वक्तव्य मे स्पष्ट कएल गेल अछि जे विवाद समाधान लेल संवाद आ कूटनीति सर्वोत्तम मार्ग अछि। सभ राष्ट्रक संप्रभुता आ क्षेत्रीय अखंडताक सम्मान अनिवार्य अछि। विदेश मंत्रालय इहो जनौने अछि जे प्रभावित क्षेत्र मे स्थित भारतीय दूतावास भारतीय नागरिक सभ सं सतत संपर्क मे अछि आ आवश्यक परामर्श जारी कए रहल अछि। भारतीय नागरिक सभ कें स्थानीय प्रशासनक निर्देश पालन करबाक आ दूतावास सं संपर्क बनौने रखबाक परामर्श देल गेल अछि। एहि प्रकार वर्तमान घटनाक्रम सं मध्य-पूर्व मे गंभीर अस्थिरता उत्पन्न भए गेल अछि आ वैश्विक स्तर पर कूटनीतिक प्रयासक आवश्यकता अनुभव कएल जा रहल अछि।
