बिहारशरीफ। नीतीश कुमार शनिकें राजगीर पहुंचि प्रसिद्ध मलमास मेला-2026 क तैयारीक समीक्षा कएलनि आ संबंधित अधिकारीसभके आवश्यक निर्देश देलनि।
मुख्यमंत्री पहिने गृद्धकूट भवनक निरीक्षण कएलनि आ ओतयक व्यवस्था विषयमे जानकारी लेलनि। गृद्धकूट भवन सं होइत नव रोप-वे सेहो देखलनि आ पर्यटक सुविधा विषयमे जानकारी प्राप्त कएलनि। हुनकर निर्देश रहल जे व्यवस्था निरंतर बेहतर ढंग सं संचालित हो, जाहि सं आगंतुक पर्यटकके कोनो प्रकारक दिक्कत नहि हो।
एहि उपरांत मुख्यमंत्री राजगीर इंटरनेशनल कन्वेंशन सेंटर मे मलमास मेला-2026 तैयारीक समीक्षा कएलनि। नालंदाक जिलाधिकारी कुंदन कुमार मेला संबंधी विस्तृत जानकारी प्रस्तुत कएलनि। मुख्यमंत्री कहलनि जे मेला दौरान पैघ संख्या मे श्रद्धालु पहुंचैत छथि, तेनाहि हुनकर आवासन, पानि, साफ-सफाई आ सुरक्षा पर विशेष ध्यान देल जाय।
मुख्यमंत्री स्वच्छ पेयजल, घाट सफाई, आवागमन सुविधा दुरुस्त करबाक आ चिकित्सीय सुविधा सुदृढ़ रखबाक निर्देश देलनि। हुनकर कहना छल जे संभावित भीड़के ध्यानमे रखैत आवासन, चिकित्सा आ सुरक्षा व्यवस्थाके पुख्ता बनायल जाय, जाहि सं श्रद्धालुके कोनो कठिनाई नहि हो।
एहि क्रममे मुख्यमंत्री नवादा जिलाक नारदीगंज अंचलक मोतनाजे गाम समीप गंगाजी राजगृह जलाशयक निरीक्षण सेहो कएलनि। अधिकारीसभ बतौलनि जे गंगाजी जल आपूर्ति योजना अंतर्गत गया, बोधगया, नवादा आ राजगीरमे शुद्ध पेयजल उपलब्ध कराओल जा रहल अछि।
निरीक्षण दौरान ग्रामीण विकास मंत्री श्रवण कुमार, सांसद कौशलेंद्र कुमार, विधायक कृष्ण मुरारी शरण उर्फ प्रेम मुखिया आ विधायक कौशल किशोर सहित आन गणमान्य व्यक्ति उपस्थित छलाह।
