मधुबनी, समदिया| भाकपा (माले) जिला कमिटीक बैठक जिला सचिव ध्रुव नारायण कर्णक अध्यक्षता मे सम्पन्न भेल। विस्तृत विचार-विमर्श बाद जिला कमिटी निर्णय लेल गेल जे आगामी 8म जिला सम्मेलन 10 आ 11 अप्रैल केँ मालेनगर, लहरियागंज मे आयोजित कएल जाएत।
जिला सम्मेलन लेल प्रखंड स्तर पर प्रतिनिधि सभक चुनाव कएल जाएत, जकर अधिसूचना जारी कए देल गेल अछि। एहि सम्मेलन मे 15 प्रखंड सं प्रतिनिधि सभ भाग लेताह।
बैठक मे ईहो निर्णय लेल गेल जे बुलडोजर राजक विरोध मे मजबूत जन-प्रतिरोध खड़ा कएल जाएत। मधुबनी जिला मे हजारों मजदूर आ किसान सभक घर-घरारी उजाड़बाक नोटिस देल जा रहल अछि, जाहि सं लोक सभ मे असुरक्षा क भावना बढ़ि रहल अछि। पूरा जिला मे सूदखोर सभक आतंक व्याप्त अछि, मुदा प्रशासन निष्क्रिय देखाइत अछि। एहि मुद्दा सभ केँ लए जिलाव्यापी आंदोलन चलाबएक निर्णय लेल गेल अछि।
बैठक केँ संबोधित करैत पार्टीक पोलित ब्यूरो सदस्य धीरेंद्र झा कहलनि जे बिहार मे महिला सभक विरुद्ध बढ़ैत हिंसा, अपराध आ बुलडोजर राजक आतंक देखल जा रहल अछि। हुनकर आरोप अछि जे नीतीश कुमार आब भाजपा क प्रभाव मे चलि गेल छथि आ जदयू पर कब्जा करए क कोशिश भए रहल अछि।
ओ कहलनि जे सत्ता क कुर्सी बदलबाक राजनीति मे नेता सभ व्यस्त छथि, जखनकि आम जनता कठिनाई झेलि रहल अछि। हुनका विश्वास अछि जे बिहारक जनता भाजपा क राजनीति केँ परास्त कए नव विकल्प तैयार करत।
बैठक मे श्याम पंडित, भूषण सिंह, मदनचंद्र झा, मयंक यादव, योगनाथ मंडल, विजय दास, विशंभर कामत, लक्ष्मण राय, नवल यादव, महाकांत यादव, योगेंद्र यादव आदि अपन विचार व्यक्त कएलनि।
