- सीएम कें ज्ञापन देमय जा रहल छलाह कांग्रेसी, राजापुल लग रोकल गेला
- कांग्रेसी का कार्यकर्ता बैरिकेडिंग कें तोड़बाक कएलनि प्रयास
पटना, समदिया
11 वर्षीय दलित बच्ची सं दुष्कर्म आ तकर उपरांत भेल मृत्युक विरोध मे कांग्रेस द्वारा सोमदिन ‘हल्ला बोल’ मार्च निकालल गेल। ई मार्च सदाकत आश्रम सं आरंभ भेल आ लगभग अपराह्न 1 बजे कांग्रेस कार्यकर्ता मुख्यमंत्री आवास दिस प्रस्थान केलनि। प्रदेश अध्यक्ष राजेश राम संग यूथ कांग्रेसक राष्ट्रीय अध्यक्ष उदय भानु सेहो कार्यकर्ताक संग मुख्यमंत्री कें ज्ञापन सौंपबाक उद्देश्य सं मार्च मे सम्मिलित छलाह। पुलिस आ प्रशासन द्वारा कार्यकर्ता सभ कें राजा पुल पर रोकि देल गेल। पूर्वहि सं भारी पुलिस बल तैनात छल आ बैरिकेडिंग केर व्यवस्था कएल गेल छल।
ओहि ठाम कार्यकर्ता आ पुलिस बीच तकरार भेल। प्रदर्शनकारी सभ बैरिकेड्स कें तोड़बाक प्रयास केलनि आ ओहि पर चढ़ि कए नारेबाजी सेहो कएल गेल। विवादक उपरांत यूथ कांग्रेसक राष्ट्रीय अध्यक्ष उदय भानु आ बिहार यूथ कांग्रेसक प्रदेश अध्यक्ष शिव प्रकाश गरीबदास कें पुलिस अपन संग गाड़ी मे लए कए चलि गेल।
कांग्रेस केलक स्वास्थ्य मंत्रीक इस्तीफाक मांग
कांग्रेसक आरोप अछि जे बच्चीक पीएमसीएच मे उपचार मे भारी लापरवाही भेल। 31 मई कें लगभग चारि घंटा धरि संघर्षक बाद बच्ची कें अस्पताल मे भर्ती कएल गेल, ताहू काल ओ एम्बुलेंस मे जीवन-मृत्यु सं जूझैत रहल। सरकारक विरोध मे नारेबाजी करैत कांग्रेस कार्यकर्ता सभ स्वास्थ्य मंत्री मंगल पांडेयक इस्तीफाक मांग कएलनि। प्रदेश अध्यक्ष राजेश राम कहला जे बीजेपी बलात्कारी सभक संग घूमनिहार पार्टी अछि। ओ बच्ची चारि घंटा धरि एम्बुलेंस मे प्राणक रक्षा लेल संघर्ष करैत रहल, मुदा एहन गंभीर विषय पर प्रश्न उठेनाइ बीजेपी कें राजनीति बुझा रहल अछि।
एहन विषय पर राजनीति उचित नहि
एहि प्रकरण पर बीजेपी प्रदेश अध्यक्ष दिलीप जायसवाल कहलनि जे दोषी सभ पर कठोर कार्रवाई होयत। ई बहुत दुखद घटना अछि, मुदा कांग्रेस कें एहन विषय पर राजनीति नहि करबाक चाही। ओ कहलनि जे जखन ओ लोकनि बच्ची कें भर्ती कराबय गेल छलाह, तखन ओ कांग्रेस नेता नहि, बल्कि एकटा मानव छलाह। मुदा एहि विषय पर राजनीति कएल जाए, तं ई अत्यंत दुर्भाग्यपूर्ण बात अछि, ताहि लेल तं हुनकर पार्टीक नाव डूबि रहल अछि।
एहि हत्याकांड मे सरकारक संलिप्तता अछि
प्रदेश कांग्रेस अध्यक्ष राजेश राम आरोप लगेलनि जे एहि जघन्य दुष्कर्म आ हत्याकांड मे बिहार सरकार स्वयं संलिप्त अछि। हुनकर कथन अनुसार जाहि दिन प्रधानमंत्री मोदी बिहार मे डबल इंजन सरकारक नाम पर जंगलराज समाप्त करबाक दावा कएलनि, ठीक ओहि दिन ई अमानवीय घटना घटित भेल। ई डबल इंजन सरकार पूर्णतः निकम्मा भए चुकल अछि आ महिलाक सम्मान देबा मे लगातार विफल रहल अछि। ओ कहलनि जे ई बात आश्चर्यजनक अछि जे पीड़ित बच्ची कें मुजफ्फरपुर सं पटना लाओल गेल, मुदा सरकार ओकर समुचित उपचार सुनिश्चित नहि कए सकल। एहि कारण ओकर मृत्यु भए गेल। ई घटना अत्यंत निंदनीय अछि।
हमरा सिस्टम आ सरकार सं न्याय चाही : पीड़िताक परिवार
मुजफ्फरपुरक कुढ़नी थाना क्षेत्र मे भेल जघन्य कांडक बाद पूरा गाम मे शोकक लहरि अछि। एकर संगहि स्थानीय लोक मे सिस्टम आ सरकारक प्रति रोष सेहो देखल जा रहल अछि। एहि संबंध मे मृत बालिकाक माय अत्यंत विषादपूर्ण स्वर मे कहलनि जे घायल अवस्था मे हमर बेटी सिर्फ इशारा कए कहल जे हमर गला काटल गेल अछि। एक माय छी, ओकरे नोकर देखि कए बुझि गेलौं जे ओकर संग कतबा भयावह कांड भेल अछि। ओ न्यायक याचना करैत कहली जे हमर एकेटा मांग अछि – न्याय। कोनो हाल मे हमर बेटी कें न्याय भेटबाक चाही।
सरकारी स्वास्थ्य व्यवस्था पर रोष प्रकट करैत महिला देशक प्रमुख अस्पताल सभ पर तीक्ष्ण कटाक्ष केलनि। ओ कहलनि जे हमरा बच्ची कें उचित उपचार नहि भेटल। हम सरकारक स्वास्थ्य व्यवस्था सं अत्यंत दुखी छी। जं व्यवस्था ठीक रहितए तं हमर बच्ची आइ जीवित रहैत। ओ भावुक स्वर मे जोड़लनि हमर बच्ची कें कोनहुं हाल मे न्याय भेटक चाही। न्याय नहि भेटल तं हमर सभक भरोसा टूटि जायत।
