नई दिल्ली, एजेंसी
रक्षा मंत्री राजनाथ सिंह ‘ऑपरेशन सिंदूर’ लेल भारतीय सेनाक प्रशंसा करैत कहलनि जे भारत पाकिस्तानक भीतर घुसि क’ प्रहार केलक। ओ कहलनि जे जे भारत विरोधी आ आतंकी संगठन सभ भारत माताक मस्तक पर प्रहार क’ कतेको परिवारक सिंदूर पोछि देने छल, ओकरा विरुद्ध भारतीय सेना ‘ऑपरेशन सिंदूर’ केर माध्यम सं न्याय करबाक काज केलक। एहि लेल आइ सम्पूर्ण देश भारतीय सेनासभक अभिनंदन क’ रहल अछि।
ओ आगां कहलनि जे ‘ऑपरेशन सिंदूर’ केवल एकटा सैन्य कार्रवाई नहि अछि, बल्कि ई भारतक राजनीतिक, सामाजिक आ सामरिक इच्छाशक्तिक प्रतीक छी। ई ऑपरेशन भारतक आतंकवादक विरुद्ध दृढ़ संकल्प, सेनाक क्षमता आ निश्चयशक्तिक प्रदर्शन छी। हमरा द्वारा ई स्पष्ट क’ देल गेल अछि जे भारत जखन आतंकवादक विरुद्ध कार्रवाई करैत अछि, तं ओहि ठाम आतंकवादीक आ ओकर संरक्षक सभक लेल सीमा पारक धरती सेहो सुरक्षित नहि रहैत अछि।
रक्षा मंत्री कहलनि जे भारतीय सेनासभ ऑपरेशन सिंदूर शुरू केलक ताकि पाकिस्तान मे उपस्थित आतंकी संरचनाक विध्वंस कएल जाए। हम कखनो पाकिस्तानक आम नागरिक सभकें निशाना नहि बनेलौं, मुदा पाकिस्तान भारतक नागरिक क्षेत्र सभ पर प्रहार केलक आ मंदिर, गुरुद्वारा आ गिरिजाघर सभ पर हमला करबाक प्रयास केलक। भारतीय सेना संयम, शौर्य आ पराक्रमक संग पाकिस्तानक अनेक सैन्य ठिकानापर प्रहार कए मुंहतोड़ जवाब देलक। ओ कहलनि जे हमर कार्रवाई केवल सीमावर्ती सैन्य ठिकानासभ धरि सीमित नहि रहल—भारतक सेनाक धमक रावलपिंडी धरि सुनल गेल जतय पाकिस्तानी फौजक मुख्यालय स्थित अछि।
ओ आगां कहलनि जे भारत मे आतंकवादी घटनासभ करबाक परिणाम की होइत अछि, से सम्पूर्ण विश्व उरीक घटना उपरांत देखलक जखन हम पाकिस्तान मे घुसि क’ सर्जिकल स्ट्राइक केलौं, पुलवामाक बाद बालाकोट पर एयर स्ट्राइक केलौं, आ आब पहलगामक घटनाक बाद भारतक मल्टीपल स्ट्राइक देखैत संसार आश्चर्यचकित अछि। रक्षा मंत्री स्पष्ट रूप सं कहलनि जे आतंकवाद विरुद्ध जीरो टॉलरेंसक नीति पर चलैत प्रधानमंत्री नरेंद्र मोदी कहलनि जे ई नव भारत अछि, जे आतंकवाद विरुद्ध सीमाक एहि पार आ ओहि पार दुनू दिश प्रभावी कार्रवाई करत।
