रांची। स्कूली छात्राक अपहरणक मामिला मे संलिप्त समस्त अपराधी रामगढ़ जिलाक गोला क्षेत्र सं गिरफ्तार कएल गेल छथि। रांची आ रामगढ़ जिलाक पुलिस द्वारा संयुक्त रूप सं चलाओल गेल विशेष अभियान मे ई सफलता भेटल अछि। गिरफ्तारीक उपरांत पुलिसक टीम समस्त आरोपी सभ कें रांची लए कए आबि रहल अछि।
पुलिस द्वारा अपहरणकर्ता सभ सं पूछताछ उपरांत स्पष्ट होयत जे छात्राक अपहरण किएक कएल गेल छल। उल्लेखनीय अछि जे बुधदिन बिहान राँची शहरक सिरमटोली फ्लाईओवर लग स्कूल जाय रहल एक छात्रा कें अज्ञात अपराधी द्वारा अगवा कए लेल गेल छल।
ई गंभीर घटना जखन राँची एसएसपी चंदन कुमार सिन्हा केर संज्ञान मे आयल, तं ओ तत्काल दस जिलामे अलर्ट जारी कए देलनि। तदुपरांत 90 सं अधिक स्थान पर सघन जांच अभियान शुरू कएल गेल। पुलिसक दबावक कारण अपहरणकर्ता सभ बच्ची कें रामगढ़ जिलाक कुज्जू क्षेत्र मे छोड़ि कए फरार भए गेल छल।
पुनः त्वरित कार्रवाई करैत पुलिसक टीम चारूकात घेराबंदी कए समस्त अपराधी सभ कें गिरफ्तार करबाक सफलता प्राप्त कएलक। बच्चाक सकुशल बरामदगी आ अपराधी सभक गिरफ्तारी सं प्रशासन आ जनमानस मे राहतक भावना व्याप्त अछि। पुलिस एहि मामिलाक तह धरि पहुंचबाक लेल पूछताछ प्रक्रिया तेज कए देने अछि।
