भागलपुर, समदिया
भागलपुर मे गंगा नदीक जलस्तर भले स्थिर भए गेल अछि मुदा लोकक परेशानी घटल नहि अछि। खास कए सबौर प्रखंडक मसाडू गाम मे गंगा कटावक कारण सं लोक सभक घर दिन-प्रतिदिन नदी मे समा रहल अछि। मंगल कें एकटा दू मंजिला पक्का मकान गंगा मे विलीन भए गेल, जे लोकक लेल हृदय विदारक छल। एहि तरहक घटना सभ लोकक समक्ष होइत रहैत अछि, जखन हुनकर घर-द्वारि नदी मे समा रहल अछि आ लोक बस सिसकि-सिसकि कए देखैत अछि।
भागलपुर जिलाक बाढ़िक स्थिति गंभीर बनल अछि, जतय बाढ़िक पानि गाम सं शहर धरि पहुंच चुकल अछि। स्कूल-कॉलेज आ हाइवे सभ जलमग्न भए गेल अछि। एनएच-80 पर पानि चढ़ि गेल अछि, जाहि सं आवागमन पूर्ण रूप सं ठप अछि। घोषपुर आ भवनाथपुरक समीप एनएच-80 पर डेढ़ सं दू फीट पानि बहि रहल अछि आ पीरपैंती आ नवगछिया इलाका मे सेहो पानि घुसि रहल अछि।
पीरपैंतीक धनपाल टोला चौक लग पानिक तेज धार मे एक युवकक शव बरामद कएल गेल अछि। एहि स्थिति सं लोक सभक लेल सुरक्षा आ राहतिक व्यवस्था कतबा जरूरी अछि, से स्पष्ट अछि। डीएम डॉ. नवल किशोर चौधरीक अनुसार, मंगलदिन सं जलस्तर में कमी देखायल मुदा लोकक स्थिति अखनहुं बहुत चिंताजनक बनल अछि।
मुंगेर मे बाढ़ि पीड़ित लोकनि मुआवजाक मांग कें लए कए कयलनि सड़क जाम
मुंगेर मे गंगाक जलस्तर मे कमीक बाद बाढ़ पीड़ित लोकनि अपन अधिकारक लेल सड़क पर प्रदर्शन कए रहल छथि। नगर निगमक वार्ड-41 केर बाढ़ पीड़ित निवासी द्वारा मुंगेर-हेरुदियरा मुख्य पथ पर आगजनी कए सड़क जाम कए प्रदर्शन कएल गेल। लोक सभ जिला प्रशासनक विरुद्ध नारेबाजी करैत राहति केर व्यवस्था मे भेदभावक आरोप लगा रहल छथि।
सड़क जामक कारण दुनू दिन वाहनक नमहर लाइन लागि गेल आ आवागमन प्रभावित भेल। स्कूली बच्चा सभ आ यात्री सभ कें यात्रा मे बहुत परेशानी भेलनि। बाढ़ि पीड़ित लोक सभक कहब अछि जे चारि-पांच दिन सं हुनकर घर मे तीन सं चारि फुट पानि जमा अछि आ राहति केर नाम पर किछु विशेष नहि भए रहल अछि। स्थानीय पुलिस सूचना पाबि कए मौका पर पहुंचल आ ग्रामीण सभकें समझा-बुझा कए स्थिति नियंत्रित करबाक प्रयास केलक।
