इंडियन प्रीमियर लीग (आईपीएल) 2026 सं पहिने महेंद्र सिंह धोनीक चोट चेन्नई सुपर किंग्स (सीएसके) लेल पैघ झटका साबित भेल अछि। फ्रेंचाइजी द्वारा शनि दिन जारी बयान अनुसार धोनी टूर्नामेंटक पहिल दू सप्ताह मे नहि खेलताह।
टीम अपन आधिकारिक बयान मे बतौलक जे धोनी एखन काफ स्ट्रेन (पिंडलीक मांसपेशी मे खिंचाव) सं उबरि रहल छथि आ रिहैबिलिटेशन प्रक्रिया सं गुजरि रहल छथि, जाहि कारण ओ शुरुआती मुकाबला सं बाहर रहताह।
धोनी आईपीएल इतिहासक सभ सं सफल कप्तान सभ मे सं एक छथि आ हुनकर कप्तानी मे चेन्नई सुपर किंग्स पांच बेर खिताब जीतल अछि। हुनकर अनुभवक कमी टीम कें शुरुआती मैच मे खलि सकैत अछि।
पछिला सीजन मे धोनी 13 पारी मे 196 रन बनौलनि, जाहिमे हुनकर स्ट्राइक रेट 135.17 रहल। ओ सीजन मे 12 चौका आ 12 छक्का लगौलनि, जखनकि डेथ ओवर मे हुनकर स्ट्राइक रेट 151.72 रहल।
सीएसकेक समस्या एतहि समाप्त नहि भेल अछि। टीमक शीर्ष क्रमक बल्लेबाज मैथ्यू शॉर्ट सेहो अंगूठा मे फ्रैक्चर कारण शुरुआती मैच सं बाहर रहताह। ओतहि तेज गेंदबाज नाथन एलिस हैमस्ट्रिंग इंजरी कारण पूरा टूर्नामेंट सं बाहर भए चुकल छथि। एहन स्थिति मे आईपीएल 2026 क शुरुआत सं पहिने चेन्नई सुपर किंग्स कें कतेको पैघ झटका लागल अछि, जाहि सं टीमक रणनीति पर असरि पड़ि सकैत अछि।
