कुल 22 मुकाबला खेलल जाएत
भारतीय क्रिकेट नियंत्रण बोर्ड भारतीय पुरुष क्रिकेट टीमक घरेलू अंतरराष्ट्रीय सत्र 2026-27क कार्यक्रम घोषित कए देलक अछि। एहि सत्र मे भारत वेस्टइंडीज, श्रीलंका, जिम्बाब्वे आ ऑस्ट्रेलियाक मेजबानी करत। पूरा सत्र मे 17 शहर मे कुल 22 अंतरराष्ट्रीय मुकाबला खेलाए जाएत, जाहि सं देश भरक दर्शक सभ कें उच्च स्तरक क्रिकेट देखबाक अवसर भेटत।
वेस्टइंडीजक विरुद्ध श्रृंखला सं शुरुआत
घरेलू सत्रक शुरुआत 27 सितंबर 2026 सं वेस्टइंडीज क विरुद्ध होएत। एहि दौरा मे तीन एकदिवसीय आ पांच टी-20 अंतरराष्ट्रीय मुकाबला खेलाए जाएत। एकदिवसीय मैच तिरुवनंतपुरम, गुवाहाटी आ न्यू चंडीगढ़ मे होएत, जखनकि टी-20 मुकाबला लखनऊ, रांची, इंदौर, हैदराबाद आ बेंगलुरु मे आयोजित कएल जाएत।
श्रीलंकाक विरुद्ध उज्जर गेंदक मुकाबला
दिसंबर 2026 मे श्रीलंका टीम भारत दौरा पर आएत। एहि दौरान तीन एकदिवसीय आ तीन टी-20 मुकाबला खेलाए जाएत। एकदिवसीय मैच दिल्ली, बेंगलुरु आ अहमदाबाद मे होएत, जखनकि टी-20 मैच राजकोट, कटक आ पुणे मे खेलाए जाएत।
जिम्बाब्वेक विरुद्ध एकदिवसीय श्रृंखला
नव वर्ष 2027 क शुरुआत मे जिम्बाब्वे टीम भारत दौरा पर आएत। एहि दौरान तीन एकदिवसीय मुकाबला खेलाए जाएत, जे कोलकाता, हैदराबाद आ मुंबई मे आयोजित होएत।
ऑस्ट्रेलियाक विरुद्ध टेस्ट श्रृंखला सं समापन
घरेलू सत्रक समापन ऑस्ट्रेलिया क विरुद्ध पांच मैचक टेस्ट श्रृंखला सं होएत, जाहि क शुरुआत 21 जनवरी 2027 सं नागपुर मे होएत। एहि क बाद चेन्नई, गुवाहाटी, रांची आ अहमदाबाद मे मुकाबला खेलाए जाएत। ई श्रृंखला विश्व क्रिकेटक दू मजबूत टीम सभक बीच कड़ी टक्करक गवाह बनत।
