बगहा-बेतिया मे तटबंध टूटला सं दर्जनों गाम मे भरल पानि
एनडीआरएफ संभारलक मोर्चा
फोटो 102
पटना। नेपाल मे भारी बरखा के बाद वाल्मीकिनगर आ वीरपुर बैराज सं भारी मात्रा मे पानि छोड़ल गेल। एहि सं उत्तर बिहार मे बाढ़िक स्थिति गंभीर भए गेल अछि। राज्यक 17 जिला मे अलर्ट जारी कयल गेल अछि। बगहा लग गंडक नदीक जलस्तर आब तकक सब सं ऊंच फ्लड लेवल 90.90 मीटर के पार कए गेल अछि। ई करीब 35 सेंटीमीटर ऊपर पहुंचि गेल अछि। एहि दबावक कारण पश्चिमी चंपारणक बगहा-1 प्रखंडक खैरटवा गाम मे चंपारण तटबंध 10 मीटर लंबाई मे अनचोके टूटि गेल। पानि खेत सभ मे पसरि रहल अछि।
बेतिया मे सेहो चंपारण तटबंध देर राति करीब 2 बजे टूटि गेल, जाहि कारण निचला इलाका मे बाढ़िक पानि सं खतरा बढ़य लागल अछि। मंगलदिन भोर मे मोतिहारी मे रिंग बांध टूटि गेल, जाहि सं निचला इलाका सभ मे पानि भरय लागल अछि। 70 घर मे पानि भरि गेल अछि। एनडीआरएफक टीम लोक सभ के सुरक्षित बाहर निकालि रहल अछि।
बगहा-1 प्रखंड मे गंडक नदीक दबावक कारण सोमदिन सांझ करीब 8:30 बजे खैरटवा लग चंपारण तटबंध टूटि गेल। पानि तेजी सं गाम सभ आ निचला इलाका दिस पसरय लागल अछि। राष्ट्रीय राजमार्ग-727 पर सेहो पानि पहुंचि गेल अछि।
एहि सं आवागमन प्रभावित भेल अछि। आशंका जताओल जा रहल अछि जे एहि कारण 50 हजार घर पानि मे डूबि सकैत अछि। चखनी रजवटिया सं रतवल जायबला करीब 14 किलोमीटर लंबा सड़क एहि तटबंध पर बनल अछि।
तटबंध टूटला सं खैरटवा, पिपरिया, सिंगारी गढ़वा, रजवटिया, चखनी, बड़गांव, छोटकीपट्टी, एकडेरवा आ डुमरिया सहित कतेको गाम प्रभावित होबाक आशंका अछि। स्थानीय स्तर पर अनुमान अछि जे एहि इलाका सभक 50 हजार सं बेसी आबादी बाढ़िक चपेट मे आबि सकैत अछि।
मोतिहारी मे दूटा तटबंध टूटि गेल अछि। मंगलदिन दुपहर मे सिकटिया दह लग बांध टूटि गेल। एहि सं कतेको इलाका मे बाढ़िक खतरा बढ़ि गेल अछि। मोतिहारी मे रिंग बांध टूटलाक बाद 70 घर मे पानि प्रवेश कए गेल अछि। घर मे फंसल लोक सभ के सुरक्षित निकालि सुरक्षित जगह पर लए’ जायल जा रहल अछि।
उपमुख्यमंत्री कहलनि- नेपाल मे भए रहल बरखा सं बिहार मे चिंता बढ़ल
बिहार मे बाढ़िक गंभीर स्थिति कें देखैत उपमुख्यमंत्री आ जल संसाधन मंत्री विजय कुमार चौधरी प्रेस कॉन्फ्रेंस कयलनि।
विजय चौधरी कहलनि जे नेपाल मे भेल बरखाक असर बिहार मे देखाइत अछि। एहि सं एक बेर फेर बाढ़िक संकट सोझां आबि गेल अछि। ओ कहलनि जे बाढ़िक पैटर्न बदलि रहल अछि। 2024क तुलना मे एहि साल जलस्राव कम अछि। विजय चौधरी कहलनि जे जल संसाधन विभागक टीम रातिये वाल्मीकिनगर पहुंचि गेल छल। ओतय अधिकारी सभक टीम लगातार स्थिति पर नजरि रखने अछि। विजय चौधरी आशा जतौलनि जे सांझ धरि स्थिति मे सुधार होयत। जं नेपाल मे आगू बरखा नहि भेल तं स्थिति आओर नीक होयबाक उम्मीद अछि।
पश्चिम चंपारण जिलाक बैरिया प्रखंड मे मंगलदिन आधा राति करीब 2 बजे चंपारण तटबंध टूटि गेल। गंडक नदीक जलस्तर बढ़लाक कारण ई घटना भेल। तटबंध टूटलाक बाद पानि तेजी सं निचला इलाका सभ मे पसरय लागल, जाहि सं बाढ़िक खतरा बढ़ि गेल अछि।
फुलियाखांड़ पंचायतक वार्ड 5 लग तटबंध मे पहिने सं रिसाव भए रहल छल। राति मे पानिक दबाव बढ़लाक कारण तटबंध टूटि गेल। ग्रामीण सभ तुरंत जल संसाधन विभाग के सूचना देलनि, मुदा टीम पहुंचैत-पहुंचैत तटबंधक पैघ हिस्सा ढहि गेल छल। तेज बहावक कारण मरम्मतिक काज तुरंत शुरू नहि भए सकल।
तटबंध टूटलाक कारण फुलियाखांड़, श्यामपुर आ शिवराजपुर सहित दर्जनों गाम मे चिंता बढ़ि गेल अछि। पानि खेत सभ आ निचला इलाका सभ मे तेजी सं पसरि रहल अछि। एहि सं लोक सभ के आवागमन, जानवर सभ के सुरक्षित जगह पर लए’ जायब आ जरूरी सामान बचायब चुनौतीपूर्ण भए सकैत अछि। ग्रामीण सभक कहब अछि जे समय पर रिसावक मरम्मति भेल रहैत तं एहि घटना के टारल जा सकैत छल।
स्थिति कें देखैत एनडीआरएफक 30 सदस्यीय टीम के घटनास्थल पर तैनात कयल गेल अछि। टीम के आपात स्थिति मे राहति आ बचाव काज लेल तैयार राखल गेल अछि। प्रशासन निचला इलाका मे रहयबला लोक सभ सं सुरक्षित आ ऊंच स्थान पर जायबाक अपील कयने अछि।
खगड़िया जिलाक अलौली प्रखंड मे केंद्रीय मंत्री चिराग पासवानक पैतृक गाम सहरबन्नी मे कोसी बाढ़िक पानि घुसि गेल अछि।
मोतिहारीक अरेराज अनुमंडल क्षेत्र सं गुजरयबला एसएच-74 पर इजरा लग बाढ़िक पानि चढ़ि गेल अछि। बाढ़िक पानि घुसबाक सूचना भेटिते अरेराज एसडीओ सहित अन्य अधिकारी बाढ़ि प्रभावित इलाका सभक निरीक्षण करय पहुंचलाह।
बेगूसराय मे एक बेर फेर बाढ़िक खतरा मंडराय लागल अछि। पछिला 24 घंटा मे एतय गंगाक जलस्तर 34 सेंटीमीटर बढ़ल अछि।
मुजफ्फरपुर मे बागमती नदी खतरा निशान सं ऊपर बहि रहल अछि। ओतहि गंडक नदी सेहो खतरा निशानक बराबरि बहि रहल अछि। नदी सभक जलस्तर लगातार बढ़ि रहल अछि।
