स्वतंत्रता सेनानी एक्सप्रेसक एसी कोच मे निकलल सांप, मचल अफरा-तफरी

 

 

• मुजफ्फरपुर मे बदलल गेल पूरा बोगी

 

जयनगर,  समदिया

जयनगर सं दिल्ली जा रहल स्वतंत्रता सेनानी एक्सप्रेसक सेकंड एसी कोच मे शनिदिन सांप निकलि अएला सं यात्रीक बीच हड़कंप मचि गेल। ट्रेनक ए-2 एसी कोच मे यात्री सभ सीट उपरक पैनल लग सांप सन जीव देखलनि, तकर बाद ओतय सवार लोक सभ भयभीत भए गेलाह। यात्री सभ तत्क्षण एकर सूचना टीटीई आ रेलवे कर्मी कें देलनि। सांपक भयक बीच यात्री किछु दूर धरि यात्रा करैत रहलाह। दरभंगा स्टेशन पर रेलवे कर्मी कोचक जांच-पड़ताल केलनि, मुदा सांप नहि भेटल। बाद मे ट्रेन मुजफ्फरपुर पहुंचला पर रेलवे द्वारा पूरा ए-2 कोच कें ट्रेन सं अलग कए देल गेल आ ओकर स्थान पर दोसर बोगी जोड़ि ट्रेन कें आगू पठाओल गेल।

ट्रेन मे यात्रा करैत मधुबनी निवासी अरुण ठाकुर सोशल मीडिया पर घटनाक वीडियो साझा केलनि, जे बाद मे तेजी सं प्रसारित होइत रहल। हालांकि, वायरल वीडियो आ घटनाक स्वतंत्र पुष्टि नहि भए सकल अछि।

अरुण ठाकुर अपन फेसबुक पोस्ट मे कहलनि जे ओ अपन परिवारक संग ट्रेन संख्या 12561 स्वतंत्रता सेनानी एक्सप्रेस सं शनिदिन यात्रा कए रहल छलाह। जयनगर सं ट्रेन खुललाक बाद दरभंगा पहुंचबा सं पहिने ए-2 एसी कोच मे सीटक उपरक पैनल लग एकटा सांप सन जीव देखाइ पड़ल। एकरा देखिते कोच मे सवार यात्री सभ मे भय पसरि गेल। लोक सभ तत्काल रेलवे कें एकर सूचना देलनि।

दरभंगा मे पैनल खोलि कएल गेल जांच

ट्रेन दरभंगा स्टेशन पहुंचला पर रेलवे कर्मी ए-2 कोच मे पहुंचलाह आ पैनल खोलि जांच केलनि। मुदा जांचक क्रम मे कतहु सांप नहि भेटल। जांच पूरा भेलाक बाद ट्रेन कें दरभंगा सं आगू विदा कए देल गेल। एहि बीच यात्री सभ सांपक आशंका सं सहमल रहलाह। राति करीब साढ़े 9 बजे ट्रेन मुजफ्फरपुर जंक्शन पहुंचल। ओतय रेलवे अधिकारी आ कर्मी पूरा कोच कें खाली करौलनि आ फेर कोच मे गहन जांच कएल गेल। मुदा एहि बेर सेहो सांपक कोनो पता नहि चलल।

मुजफ्फरपुर मे बदलल गेल ए-2 कोच

सांप नहि भेटलाक बाद रेलवे ए-2 कोच कें ट्रेन सं अलग करबाक निर्णय लेलक। ओकर स्थान पर दोसर बोगी जोड़ल गेल आ ट्रेन कें आगू विदा कएल गेल। कोच बदलला सं यात्री सभ राहतिक सांस लेलनि। एहि प्रक्रिया मे ट्रेन करीब एक घंटा विलंब सं राति करीब 11 बजे मुजफ्फरपुर सं खुलल। रेलवे कर्मीक अनुसार, सांप पैनलक भीतर कोनो छेद सं घुसि गेल अथवा बाहर निकलि गेल होयत, जाहि कारणें बाद मे ओ देखाइ नहि पड़ल। हालांकि, यात्री सभक सुरक्षा कें ध्यान मे राखि एहतियातक रूप मे पूरा एसी कोच बदलि देल गेल। अरुण ठाकुर कोच बदलल गेलाक बाद रेलवे अधिकारी आ समस्तीपुर रेल मंडलक कर्मी सभक प्रति आभार व्यक्त केलनि। हुनकर कहब छल जे मुजफ्फरपुर जंक्शन पर रेलवे कर्मी बिना समय गमौने दोसर बोगी जोड़ि देलनि, जाहि सं यात्री सभक आगांक यात्रा चिंता-मुक्त भए सकल।