बेगूसराय मे 5 करोड़क कोठी सं 4.50 लाख बरामद
पटना। बिहार ओपन स्कूलिंग एंड एग्जामिनेशन बोर्डक डिप्टी डायरेक्टर अजय कुमार सिंहक घर आर्थिक अपराध इकाई (ईओयू) छापेमारी कएलक अछि। पटना स्थित हुनकर घर सं 30 लाख सं बेसी नगद भेटल अछि। बेगूसराय स्थित घर सं सेहो 4.50 लाख रुपैया जब्त कएल गेल अछि। दुनू शहर मे करीब 10 करोड़ रुपैयाक आलीशान कोठी होयबाक जानकारी सामने आयल अछि। बताओल जा रहल अछि जे बेगूसराय वाली कोठी नौकरी लगलाक बाद बनाओल गेल अछि।
आय सं 90 प्रतिशत बेसी 3.43 करोड़ रुपैयाक संपत्ति अर्जित करबाक मामिला मे ईओयू पटना आ बेगूसराय स्थित हुनकर तीन ठिकाना पर एक संग तलाशी अभियान चला रहल अछि।
ईओयू केर 15 सदस्यीय टीम बृहस्पति भोर 8:30 बजे खाजपुराक आकाशवाणी रोड स्थित चंद्रतारा भवन पहुंचल आ छानबीन मे जुटि गेल।
पटना स्थित घर सं कीमती गहना, जमीनक दस्तावेज आ करोड़ो रुपैयाक निवेश सं संबंधित कागजात बरामद भेल अछि। डिप्टी डायरेक्टर अजय कुमार सिंह घर पर मौजूद छथि आ पूरा घरक तलाशी लेल जा रहल अछि। बेसमेंट आ पार्किंग मे सेहो आर्थिक अपराध इकाईक टीम छानबीन कए रहल अछि।
बेगूसराय मे 3 गाड़ी सं पहुंचल टीम
ईओयू केर 10 अधिकारी तीन गाड़ी सं पैघ संख्या मे पुलिस बलक संग करीब 8:30 बजे अजय सिंहक साहेबपुर कमाल थाना क्षेत्रक परोरा गाम स्थित पैतृक घर पहुंचलाह।
ओतय सं एकटा गाड़ी सं अधिकारी आ पुलिसक टीम पचवीर स्थित अजय सिंहक भाय धर्मेंद्र सिंहक बालू-सीमेंट दोकान पहुंचल। करीब 1 घंटा धरि कागजातक जांच कएलाक बाद सभ अधिकारी परोरा गाम पहुंचलाह।
पैतृक आवास पर छापेमारी जारी अछि। सुरक्षा व्यवस्था कें लए बलिया एसडीओ, साहेबपुर कमालक बीडीओ आ थानाध्यक्ष घटनास्थल पर मौजूद छथि।
परोरा गाम मे सभ सं बेसी संपन्न मानल जायबला अजय सिंहक घरक आसपास कतेको लोक जुटि गेलाह। ककरो भीतर जाय नहि देल जा रहल अछि। मोबाइल सेहो जमा कराओल जा रहल अछि।
आय सं 3.43 करोड़ बेसी संपत्तिक मामिला
अजय कुमार सिंह पर आय सं 3 करोड़ 43 लाख 78 हजार 300 रुपैया बेसी संपत्ति अर्जित करबाक आरोप अछि।
ईओयू केर अनुसार, ई हुनकर ज्ञात आय सं करीब 90.04 प्रतिशत बेसी अछि। ई कारबाइ पटना स्थित विशेष निगरानी न्यायालय सं प्राप्त तलाशी वारंटक आधार पर कएल जा रहल अछि।
19 अगस्त कें आर्थिक अपराध इकाई थाना कांड संख्या 19/26 दर्ज कएल गेल अछि। मामिला भ्रष्टाचार निवारण अधिनियम, 1988 (संशोधित 2018) केर धारा 13(2) सहपठित धारा 13(1)(बी) केर अंतर्गत दर्ज अछि।
अजय सिंहक विवाद सं पुरान नाता
मई 2025 मे एमएलसी वंशीधर ब्रजवासी आ मुजफ्फरपुरक तत्कालीन जिला शिक्षा अधिकारी (डीईओ) अजय कुमार सिंहक बीच विवाद सामने आयल छल। तत्कालीन उपमुख्यमंत्री विजय सिन्हा 6 मई 2025 कें मुजफ्फरपुर मे आयोजित जिला कार्यक्रम क्रियान्वयन समितिक बैठक मे अजय कुमार सिंह कें विद्यालय सभ मे भेल विकास काज आ आधारभूत संरचना, बेंच-डेस्क, मरम्मति आ समरसेबलक भुगतानक जानकारी 3 दिनक भीतर उपलब्ध करयबाक निर्देश देने छलाह।
निर्देश पूरा नहि भेलापर मई 2025 केर अंत मे एमएलसी डीएम कें पत्र लिखि अजय सिंह पर जानकारी नुकेबाक आरोप लगौने छलाह।
मुजफ्फरपुरक डीईओ रहैत अजय कुमार सिंह फरवरी 2025 मे तत्कालीन भाजपा विधायक पर धमकी देबाक आरोप लगौने छलाह। अजय कुमार सिंह भाजपा विधायक अशोक कुमार सिंह पर गारा-गारी आ धमकी देबाक आरोप लगौने छलाह। हुनकर आरोप छल जे विधायक सरकारी आवास पर आबि नियमक विरुद्ध काज करबाक दबाव दैत छलाह आ मना करलापर उठा लेबाक धमकी देने छलाह।
