बेगूसराय, समदिया
बेगूसराय जिला मे एकटा पुलिस अधिकारीक दबंगईक बाद भारी बवाल भए गेल। घटनाक एकटा वीडियो सेहो सोशल मीडिया पर खूब प्रसारित भए रहल अछि। वायरल वीडियो मे देखाइत अछि जे दुर्गा पूजा कार्यक्रमक दौरान एकटा दरोगा पहिने महिला डांसर कें थापड़ मारैत छथि आ फेर लोक सभक विरोध करबाक बाद अपन पिस्तौल निकालि भीड़ पर तानि दैत छथि। ई घटना मुफस्सिल थाना क्षेत्रक पानगाछी चौक स्थित मां वैष्णवी सार्वजनिक दुर्गा स्थानक अछि। एतय मंदिर प्रबंधन समिति द्वारा भक्ति जागरण कार्यक्रम आयोजित कयल गेल छल।
कार्यक्रम मे आसपासक बहुत रास लोक जुटल छलाह आ जागरणक आनंद उठा रहल छलाह। मीडिया रिपोर्टक अनुसार, राति करीब 3 बजे मंच पर महिला नर्तकी फिल्मी गीत पर नाचि रहल छलीह। एही बीच ड्यूटी पर तैनात दारोगा अनचोके मंच पर चढ़ि गेलाह आ पाछू दिस महिला नर्तकी कें थापड़ मारि देलनि। हुनकर एहि हरकति सं ओतय उपस्थित लोक आक्रोशित भए गेलाह।
दरोगा जखन मंच सं नीचां उतरलाह, तखन लोक सभ हुनका घेरि लेलनि आ महिला नर्तकी पर हाथ उठेबाक कारण पूछय लगलाह। एहि दौरान ओतय उपस्थित पुलिसकर्मी सभक संग लोकक धक्का-मुक्की सेहो भेल। एकरा बाद आक्रोशित दरोगा अपन डांड़ मे लागल पिस्तौल निकालि भीड़ पर तानि देलनि। वायरल वीडियो मे दारोगा गारि दैत सेहो देखाइत छथि।
मीडिया रिपोर्टक अनुसार, दारोगा देर राति धरि चलि रहल कार्यक्रम बंद करय लेल पहुंचल छलाह। कहल जाइत अछि जे हुनका द्वारा कहलाक बादो कार्यक्रम बंद नहि कयल गेल छल। महिला नर्तकी कें थप्पड़ मारबाक पहिने कार्यक्रमक आयोजक आ दारोगाक बीच सेहो धक्का-मुक्की भेल छल। आरोप अछि जे कार्यक्रम बंद नहि भेलापर दारोगा मंच पर चढ़ि गेलाह।
दोसर दिस, महिला नर्तकीक कहब छनि जे दारोगाक कहला पर ओ सभ नाचब बंद कए देने छलीह, तैयो हुनका थप्पड़ मारल गेलनि। हुनकर मांग छनि जे जाहि तरहे सार्वजनिक रूप सं हुनका थप्पड़ मारल गेलनि, तहिना सभक सोझां दारोगा हुनका लग माफी मांगथि।
एहि बीच वायरल वीडियो पर पुलिसक वरिष्ठ अधिकारी सभक नजरि सेहो पड़लनि। पुलिसक कहब अछि जे जागरण कार्यक्रम मे अश्लील नाच भए रहल छल, जाहि सं अव्यवस्था उत्पन्न भए गेल छल। स्थिति पर काबू पयबाक लेल पुलिसकर्मी मंच पर चढ़ल छलाह आ एहि दौरान हुनका सभक संग धक्का-मुक्की भेल छल। फिलहाल पूरा मामिलाक जांच कयल जा रहल अछि।
