- लंबित कांडक निष्पादन आ दुर्गापूजा मे शांति व्यवस्था बनौने रखबाक निर्देश
सहरसा, समदिया
कोसी क्षेत्र, सहरसाक पुलिस उपमहानिरीक्षक डॉ. कुमार आशीष सुपौल जिला पुलिस अधीक्षक कार्यालयक निरीक्षण कयलनि। एहि दौरान ओ कार्यालयक विभिन्न शाखा मे राखल पंजी आ अभिलेख, लंबित कांड तथा पुलिस भवन सभक स्थितिक निरीक्षण केलनि। संगहि कार्यालय मे कार्यरत पुलिस पदाधिकारी आ कर्मी सभक कार्यक मूल्यांकन कय आवश्यक दिशा-निर्देश देलनि। निरीक्षणक दौरान सभ अनुमंडल पुलिस पदाधिकारी, अंचल पुलिस निरीक्षक, पर्यवेक्षी पदाधिकारी आ थानाध्यक्ष उपस्थित छलाह। डीआइजी उपस्थित पदाधिकारी सभ कें आम जनता सबहक समस्या गंभीरतापूर्वक सुनबाक आ ओकर त्वरित तथा प्रभावकारी समाधान करबाक निर्देश देलनि। ओ कहलनि जे पुलिसक मुख्य दायित्व जनताक सुरक्षा सुनिश्चित करब आ लोकक समस्या संवेदनशीलताक संग दूर करब अछि। डीआइजी अपराध नियंत्रण पर विशेष ध्यान देबाक संग लंबित कांड सभक गुणवत्तापूर्ण आ समयबद्ध निष्पादन सुनिश्चित करबाक निर्देश देलनि। संगहि दुर्गापूजा 2026 कें शांतिपूर्ण आ सौहार्दपूर्ण वातावरण मे संपन्न करयबाक लेल विधि-व्यवस्थाक तैयारीक समीक्षा कयलनि। ओ पूजा अवधि मे सुरक्षा व्यवस्था मजबूत रखबाक आ कोनो अप्रिय परिस्थिति सं निपटबाक लेल सतर्क रहबाक निर्देश देलनि। डॉ. कुमार आशीष असामाजिक आ आपराधिक प्रवृत्तिक लोक सभ कें चिह्नित कए हुनका सभक विरुद्ध नियमानुसार निरोधात्मक कारबाइ करबाक निर्देश सेहो देलनि। ओ सभ पुलिस पदाधिकारी कें अपन-अपन क्षेत्र मे सतर्कता बरतबाक, नियमित निगरानी रखबाक आ कानून-व्यवस्था बनौने रखबाक लेल सक्रिय रहबाक निर्देश देलनि।
