नालंदा। आय सं बेसी संपत्ति अर्जित करबाक आरोप मे आर्थिक अपराध इकाई (ईओयू) शुक्र दिन पथ निर्माण विभागक कार्यपालक अभियंता संजय कुमारक विभिन्न ठाम पर छापेमारी कएलक। भ्रष्टाचारक विरुद्ध जीरो टॉलरेंस नीतिक अंतर्गत ईओयूक टीम भोरहि सं बिहारक नालंदा जिला मे दू स्थान सहित कुल तीन ठाम पर सघन तलाशी अभियान शुरू कएलक। छापेमारी बिहारशरीफक मोगलकुआं मुहल्ला आ बौलीपर स्थित हुनकर पैतृक आवास पर कएल जा रहल छल। टीम दूनू घर कें पूरा तरहे अपन घेरा मे लए लेने अछि। घरक कोनो सदस्य कें बाहर जाए आ बाहरी व्यक्ति कें भीतर आबय पर कड़ा रोक लगा देल गेल अछि।
ईओयू कें गुप्त सूचना भेटल छल जे एखन खगड़िया जिला मे पदस्थापित कार्यपालक अभियंता संजय कुमार अपन पदक दुरुपयोग कएलनि अछि। आरोप अछि जे ओ अपन ज्ञात आयक स्रोत सं बहुत बेसी बेनामी संपत्ति अर्जित केने छथि। सूचनाक सत्यापनक बाद ईओयू विधिवत मामिला दर्ज कएलक। न्यायालय सं सर्च वारंट भेटलाक बाद शुक्र दिन भोर मे अलग-अलग टीम बना कए एक संग ई कारबाइ शुरू कएल गेल।
ईओयूक अधिकारी सभ घरक भीतर मौजूद महत्वपूर्ण कागजात सभक बारीकी सं जांच कए रहल छथि। टीम जमीन-जायदाद सं संबंधित दस्तावेज, बैंक पासबुक, लॉकरक चाबी आ विभिन्न वित्तीय संस्थान मे कएल गेल निवेशक रिकॉर्डक जांच-पड़ताल कए रहल अछि।
अधिकारी सभक कहब अछि जे संपत्तिक सभ स्रोतक मिलान आय सं कएल जाएत। एकर आधार पर आगूक कारबाइ तय कएल जाएत। स्थानीय लोक सभक अनुसार भोर सं दूनू मुहल्ला मे पुलिस आ ईओयूक वाहन सभक आवाजाही बढ़ि गेल छल। छापेमारीक खबरि पसरिते आसपास भीड़ जमा भए गेल, मुदा टीम क्षेत्रक घेराबंदी कए अपन काज जारी रखने अछि।
फिलहाल छापेमारी जारी अछि। ईओयूक दिस सं एखन धरि बरामदगी कें लए कए कोनो विस्तृत आधिकारिक बयान जारी नहि कएल गेल अछि। अधिकारी सभक कहब अछि जे तलाशी पूरा भेला बादहि संपूर्ण जानकारी सार्वजनिक कएल जाएत।
