पटना। बिहार विधानसभा मे विपक्षी दलक नेता आ राजदक राष्ट्रीय कार्यकारी अध्यक्ष तेजस्वी यादव सोमदिन चुनाव आयोग आ केंद्र सरकार पर गंभीर आरोप लगबैत कहलनि जे लोकतंत्र कें बचाबय लेल इंडिया अलायंस मिलि कए आंदोलन करत। पटना मे विपक्षी दलक महागठबंधनक घटक दलक बैठक भेल, जाहि मे आगूक आंदोलन आ विरोध कार्यक्रमक रणनीति पर विस्तार सं चर्चा कएल गेल।
तेजस्वी यादव महागठबंधनक संयुक्त प्रेस वार्ता कें संबोधित करैत कहलनि जे इंडिया अलायंसक दिल्ली मे भेल बैठक मे 2 सं 8 अक्टूबर धरि प्रखंड स्तर पर कार्यक्रम आ प्रदर्शन करबाक निर्णय लेल गेल छल। एकर बाद गठबंधनक नेता सभक प्रतिनिधिमंडल राष्ट्रपति सं भेंट करबाक प्रयास करत। चारि-पांच प्रमुख स्थान पर पैघ जनसभा आ रैली आयोजित करबाक योजना सेहो अछि।
तेजस्वी यादव आरोप लगौलनि जे बिहार संए कथित चुनावी धांधलीक शुरुआत भेल। ओ चुनाव आयोग पर पक्षपात करबाक आ भाजपाक पक्ष मे काज करबाक आरोप लगौलनि। ओ मुख्य चुनाव आयुक्त ज्ञानेश कुमार पर सेहो निशाना साधैत आरोप लगौलनि जे हुनका भाजपा कें चुनाव जितेबाक लेल इस्तेमाल कएल गेल। ओ कहलनि जे मतदाता सूची सं जीवित लोकक नाम काटल जाएब आ हुनका मृत घोषित कएल जाएबाक मामिला सामने आएल अछि।
ओ दावा कएलनि जे राघोपुर सं जुड़ल एहन मामिला हुनकर पार्टी सुप्रीम कोर्ट मे सेहो उठौने छल। ओ कहलनि जे विपक्ष पहिनहि सं चुनाव आयोगक कार्यप्रणाली पर सवाल उठबैत रहल अछि। तेजस्वी आरोप लगौलनि जे चुनावी रिकॉर्ड सुरक्षित रखबाक अवधि एक वर्ष सं घटा कए 45 दिन कए देल गेल, जाहि सं कथित अनियमितताक सबूत सुरक्षित नहि रहि सकय।
ओ मुख्य चुनाव आयुक्तक चयन पैनल सं भारतक मुख्य न्यायाधीश कें हटेबाक आ केंद्रीय मंत्री कें शामिल करबाक निर्णय पर सेहो सवाल उठौलनि। ओ कहलनि जे चुनावक दौरान कथित रूप सं रुपैया बांटल गेल आ लोकक खाता मे राशि पठाओल गेल, मुदा चुनाव आयोग एहि पर प्रभावी करबाइ नहि कएलक। ओ दावा कएलनि जे सभ राजनीतिक दल कें समान अवसर नहि भेटल।
प्रेस वार्ता मे वीआईपी पार्टीक राष्ट्रीय संरक्षक मुकेश सहनी, सीपीआई (एमएल)क धीरेंद्र झा, आईपी पार्टीक अध्यक्ष आईपी गुप्ता, सीपीआईक सेक्रेटरी रामनरेश पांडे, सीपीआई (एम)क विधायक अजय कुमार आ कांग्रेस पार्टी दिस सं कपिल देव प्रसाद उपस्थित छलाह। पटना मे भेल महागठबंधनक बैठक मे इंडिया अलायंसक साझा कार्यक्रम कें बिहार मे प्रभावी तरहे लागू करबाक आ सभ घटक दल कें आंदोलन मे सक्रिय भागीदारी सुनिश्चित करबाक विषय पर चर्चा भेल।
तेजस्वी यादव बिहार मे आंदोलनक घोषणा करैत कहलनि जे 7 अक्टूबर कें इंडिया अलायंसक नेता आ कार्यकर्ता मुख्य चुनाव आयुक्त ज्ञानेश कुमारक विरुद्ध सभ प्रखंड मे आक्रोश मार्च निकालत। 8 अक्टूबर कें सभ जिला मुख्यालय पर धरना देल जाएत। पटना मे विधायक, पूर्व विधायक, जनप्रतिनिधि, विधान पार्षद आ वरिष्ठ नेता विधानसभा लग सं राजभवन धरि मार्च करताह आ राज्यपाल सं भेंट करबाक प्रयास करताह।
तेजस्वी कहलनि जे इंडिया अलायंसक प्रस्तावित पैघ रैली मे सं एकटा रैली पटना मे आयोजित करबाक प्रस्ताव राखल जाएत। ओ कहलनि जे हुनकर प्राथमिक मांग निष्पक्ष चुनाव आ सभ दल लेल समान अवसरक अछि। ओ आरोप लगौलनि जे बिहार मे बेरोजगारी, महंगाई आ गरीबी बढ़ि रहल अछि आ कानून-व्यवस्थाक स्थिति खराब अछि। ओ कहलनि जे लोकतंत्र आ संविधान कें बचाबयक लड़ाइ सभ विपक्षी दल मिलि कए लड़त।
