- पार्टी दिस सं ललन सिंह कें देल गेल छल सुलह करेबाक जिम्मेदारी
पटना, समदिया
बिहार विधान परिषदक शिक्षक-स्नातक सीट कें लए जेडीयूक विधायक अनंत सिंहक बगावती तेवर एखनहुं थमबाक नाम नहि लए रहल अछि। पार्टीक दिस सं सुलह करबाक लेल केंद्रीय मंत्री ललन सिंह कें जिम्मेदारी देल गेल, मुदा अनंत सिंह हुनका अपन शिकायतक लंबा सूची सौंपि देलनि। हुनकर स्पष्ट कहब छल जे जे व्यक्ति विधानसभा चुनाव मे हुनकर विरुद्ध प्रचार केने छलाह, तिनकर समर्थन ओ नहि करताह।
अनंत-नीरज विवाद मे चूक स्वीकारलनि ललन
मुख्यमंत्री नीतीश कुमार सं भेंटक बाद ललन सिंह कहलनि जे जेडीयूक राष्ट्रीय कार्यकारी अध्यक्ष संजय झा हुनका फोन कए अनंत सिंह सं बात करबाक आग्रह केने छलाह। तकर बाद ओ अनंत सिंह सं बात केलनि। अनंत सिंह सार्वजनिक रूप सं बयान नहि देबाक आग्रह पर सहमति सेहो देलनि। ललन सिंह कहलनि जे अनंत सिंहक किछु शिकायत अछि। हुनकर कहब अछि जे जखन सरकारक सामने अविश्वास प्रस्तावक स्थिति आएल छल, तखन जेडीयूक कतेको नेता सभ अनंत सिंह सं सरकारक समर्थन करबाक आग्रह केने छलाह। नीतीश कुमारक प्रति सम्मानक कारण ओ सरकारक समर्थन केलनि।
ललन सिंह कहलनि जे जं कोनो क्रिया होयत तं ओकर प्रतिक्रिया सेहो होएत। जखन अनंत सिंहक विरुद्ध प्रचार चलि रहल छल, तखन पार्टी कें कारबाइ करबाक चाही छल।
नीरज कुमारक विरुद्ध अभियानक आरोप
अनंत सिंहक मुख्य शिकायत चुनावक समय नीरज कुमारक कथित भूमिका कें लए अछि। हुनकर आरोप अछि जे नीरज कुमार हुनकर विरुद्ध चुनावी अभियान चलौलनि आ विरोधीसभक संग मिलि प्रचार केलनि। ललन सिंह कहलनि जे नीरज कुमारक विरुद्ध अनंत सिंहक आरोप कें पूर्णतः खारिज नहि कयल जा सकैत अछि। हुनकर अनुसार, अनंत सिंहक विरुद्ध अभियान चलल छल तं ओहि समय प्रदेश नेतृत्व कें कारबाइ करबाक चाही छल। कारबाइ नहि होएब प्रदेश नेतृत्वक चूक छल।
