स्कॉर्पियो सं आयल बदमाश सभ शाखा प्रबंधक कें जबरदस्ती उठा लए गेल

 

 

• क्रेडिट एक्सेस ग्रामीण लिमिटेडक शाखा प्रबंधकक अपहरण सं इलाका मे मचल हड़कंप

• एसडीपीओ आ थाना पुलिस घटनास्थल पर पहुंचि कए शुरू कयलक छानबीन

• संदिग्ध सबहक संग एक महिलाक रहबाक चर्चा, शाखा प्रबंधक आ सहायक प्रबंधकक मोबाइल सेहो लए गेल

 

बेनीपट्टी, समदिया

स्थानीय थाना क्षेत्रक बेहटा पछिवारी टोल स्थित क्रेडिट एक्सेस ग्रामीण लिमिटेडक शाखा प्रबंधक राहुल रंजन कें स्कॉर्पियो सवार 5 सं 7 संदिग्ध युवक द्वारा जबरदस्ती उठा लए जेबाक मामिला सोझां आयल अछि। मंगलदिन सांझ भेल एहि घटनाक बाद इलाका मे हड़कंप मचि गेल। घटनाक सूचना भेटिते बेनीपट्टी थाना पुलिस सक्रिय भए गेल। थानाध्यक्ष इंस्पेक्टर अनुप कुमार आ एसडीपीओ अमित कुमार घटनास्थल पर पहुंच कए मामिलाक छानबीन कयलनि आ शाखा मे उपस्थित लोक सभ सं पूछताछ कए घटनाक विभिन्न पहलुक जानकारी लेलनि।

जानकारीक अनुसार, मंगलदिन सांझ स्कॉर्पियो पर सवार 5 सं 7 संदिग्ध युवक बेहटा पछिवारी टोल स्थित क्रेडिट एक्सेस ग्रामीण लिमिटेडक शाखा पर पहुंचल। कहल जाइत अछि जे संदिग्ध युवक सीधे शाखाक भीतर प्रवेश कयलनि आ ओतय उपस्थित शाखा प्रबंधक राहुल रंजन कें अपन कब्जा मे लए लेलनि। तकर बाद हुनका जबरदस्ती सड़क कात ठाढ़ स्कॉर्पियो मे बैसा लेलनि आ पूर्व दिस फरार भए गेलाह।

घटनाक समय संदिग्ध युवक सबहक संग एक महिलाक सेहो उपस्थित रहबाक चर्चा अछि। हालांकि, शाखा प्रबंधक कें उठा लए जेबाक कारण आ संदिग्ध सबहक पहिचान एखन धरि स्पष्ट नहि भए सकल अछि। बताओल जाइत अछि जे शाखा प्रबंधक कें अपन संग लए जेबाक क्रम मे संदिग्ध युवक राहुल रंजन आ सहायक प्रबंधकक मोबाइल फोन सेहो लए गेलाह। संदिग्ध सबहक ओतय सं चलि गेलाक बाद सहायक प्रबंधक तत्काल डायल-112 पुलिस दल आ बेनीपट्टी थाना कें घटनाक सूचना देल गेल।

सूचना भेटिते थानाध्यक्ष इंस्पेक्टर अनुप कुमार आ एसआइ अशोक कुमार पुलिस बलक संग घटनास्थल पर पहुंचलाह। पुलिस अधिकारी घटनास्थलक निरीक्षण कयलनि आ सहायक प्रबंधक सहित ओतय उपस्थित आन लोक सभ सं पूछताछ कए प्रारंभिक जानकारी जुटौलनि। तकर बाद मामिलाक सूचना वरीय अधिकारी सभ कें देल गेल।

 

अपहरणक जानकारी भेटिते एसडीपीओ अमित कुमार सेहो घटनास्थल पर पहुंचि गेलाह। ओ शाखा मे उपस्थित लोक सभ आ सहायक प्रबंधक सं पूछताछ कए पूरा घटनाक्रम बुझबाक प्रयास कयलनि। पुलिस एहि बातक पड़ताल कए रहल अछि जे कोन परिस्थिति मे शाखा प्रबंधक कें जबरदस्ती उठा कए लए जायल गेल आ एहि घटनाक पाछां की कारण भए सकैत अछि।

एसडीपीओ अमित कुमार कहलनि जे पुलिस एहि मामिला कें गंभीरता सं लैत जांच कए रहल अछि। जल्दिए घटनाक खुलासा कयल जायत। फिलहाल पुलिस शाखा प्रबंधक कें लए जायबला संदिग्ध सबहक पहिचान, हुनका सबहक आवागमनक रस्ता आ घटनाक वास्तविक कारणक पता लगेबाक प्रयास मे जुटल अछि। एहि घटना सं इलाका मे चिंता आ बेचैनीक माहौल बनल अछि।