नई दिल्ली। भारतीय जनता पार्टी (भाजपा) 2027क चुनाव सं पहिने राष्ट्रीय अध्यक्ष नितिन नवीनक नेतृत्व मे नव संगठनात्मक टीमक घोषणा कएलक अछि। एहि फेरबदल मे दीपक म्हस्के कें आईटी सेल केर प्रमुखक जिम्मेदारी देल गेल अछि। ओतहि करीब 11 वर्ष सं भाजपा आईटी सेल केर प्रमुख रहल अमित मालवीय कें एहि पद सं हटा देल गेल अछि। प्रीति गांधी कें आईटी सेल केर सह-संयोजक नियुक्त कएल गेल अछि।
आब भाजपा आईटी सेल केर प्रभार दीपक म्हस्केक हाथ मे रहत। दीपक म्हस्के छत्तीसगढ़ सं जुड़ल भाजपाक नेता छथि। ओ भाजपा केर प्रदेश प्रवक्ता सेहो रहल छथि। पार्टी आ संगठन मे मीडिया सं जुड़ल गतिविधि मे सेहो ओ सक्रिय रहल छथि।
हालहि मे हुनका छत्तीसगढ़ मेडिकल सर्विसेज कॉरपोरेशनक अध्यक्ष बनाओल गेल छल। पार्टीक डिजिटल अभियान आ संगठनक गतिविधि कें लोक धरि पहुंचेबाक काज मे छत्तीसगढ़ मे दीपक म्हस्के सक्रिय रहल छथि।
केमिस्ट्री प्रोफेसर सं राजनीतिक संगठन धरि
दीपक म्हस्के अपन करियरक शुरुआत केमिस्ट्री प्रोफेसरक रूप मे केने छलाह। ओ खेती आ बागवानीक क्षेत्र मे सेहो काज केने छथि। चुनावी आंकड़ाक विश्लेषण, सरकारी कंपनीक बोर्ड मे पद आ तकर बाद छत्तीसगढ़ सरकार मे वरिष्ठ भूमिका मे सेहो काज केने छथि।
पार्टीक डिजिटल अभियान आ सोशल मीडिया सं जुड़ल गतिविधि मे हुनकर सक्रियता कें देखैत आब भाजपा आईटी सेल केर महत्वपूर्ण जिम्मेदारी हुनका देल गेल अछि।
अमित मालवीय कें 11 वर्ष बाद हटाओल गेल
भाजपा आईटी सेल केर प्रमुखक रूप मे करीब 11 वर्ष धरि काज कएनिहार अमित मालवीय कें पद सं हटा देल गेल अछि। हुनकर स्थान पर दीपक म्हस्के कें जिम्मेदारी देल गेल अछि। प्रीति गांधी कें आईटी सेल केर सह-संयोजक बनाओल गेल अछि।
