संजय झा कहलनि, 5 नवंबर कें होयत जदयूक समीक्षा बैसार
पटना, समदिया
बिहार विधान परिषदक शिक्षक आ स्नातक निर्वाचन क्षेत्रक चुनाव मे जेडीयूक चारि मे तीन सीट पर हारि भेल अछि। पटना स्नातक सीट पर पार्टी कसगर टक्कर मे जीत हासिल कयलक। पार्टीक किछु नेताक बागी तेवर जेडीयूक लेल परेशानी बढ़ौने छल। आब पार्टी हारिक समीक्षा कए बागी नेता सभ पर कारबाइ करबाक तैयारी मे अछि। जेडीयूक राष्ट्रीय कार्यकारी अध्यक्ष संजय झा कहलनि जे 5 नवंबर कें पार्टीक समीक्षा बैसार होयत। एहि बैसार मे चुनाव मे हारिक कारण पर विचार कयल जायत आ तकर बादे आगू निर्णय लेल जायत। हुनकर कहब छलनि जे बागी नेता सभक कारण पार्टीक परेशानी जरूर बढ़ल, मुदा समीक्षा पूरा भेलाक बादे एहि विषय मे किछु कहल जा सकैत अछि। दिवाली सं पहिने कारबाइ होयबाक संभावना जताओल जा रहल अछि।
संजय झा इहो कहलनि जे नीतीश कुमार शिक्षक सभक लेल बहुत काज कयलनि, मुदा चुनाव मे हुनका सभ कें अपेक्षित समर्थन नहि भेटल। बृहस्पति दिन जेडीयू कार्यालय मे भेल बैसार मे प्रदेश अध्यक्ष उमेश कुशवाहा आ विभिन्न जिलाक अध्यक्ष सभ शामिल भेलाह। बैसार मे 26 नवंबर कें सुशासन दिवस मनेबाक निर्णय लेल गेल।
बाक्स
हुनका सं बधाइ नहि लेब : नीरज
पटना स्नातक निर्वाचन क्षेत्र सं जीतलाक बाद नीरज कुमार मुख्यमंत्री रहल नीतीश कुमार, उपमुख्यमंत्री विजय चौधरी आ बिजेंद्र प्रसाद यादव तथा संजय झा सहित वरिष्ठ नेता सभ सं भेंट कए आशीर्वाद लेलनि। नीरज कुमार संजय झाक सहयोगक प्रशंसा करैत कहलनि जे ओ चुनावक दौरान लगातार जानकारी लैत रहलाह आ मार्गदर्शन दैत रहलाह। ओ नीतीश कुमार आ निशांत कुमारक भूमिकाक सेहो सराहना कयलनि। मुदा ललन सिंहक संदर्भ मे हुनकर बयान सं पार्टीक भीतर गुटबाजीक चर्चा तेज भए गेल अछि। नीरज कुमार कहलनि जे ओ ललन सिंह सं बधाइ नहि लेता। हुनकर माता-पिता आ पूर्वज हुनका सिखौने छथि जे जं केकरो ऋण ली, तं वापस जरूर करी। ओ कहलनि जे एहि राजनीतिक ऋण कें ओ सूदि सहित वापस करताह।
