नीरज कुमारक विरुद्ध अनंत सिंह खोललनि मोर्चा, आखिर विधायक केकर भरोसे ठोकि रहल छथि ताल?

 

 

• पार्टी सूत्रक दावा, ललन सिंहक संबंध दुनू नेता सं अछि नीक

फोटो : अनंत

पटना, समदिया

पटना स्नातक निर्वाचन क्षेत्रक मुद्दा कें लए कए जदयू मे सभ किछु ठीक नहि चलि रहल अछि। पार्टीक दू विधायक आ नेता सभक बीच बढ़ैत तनातनी आब खुलि कए सोझां आबि गेल अछि। पार्टीक लगातार दू दिन धरि चलल बैसारक बादो विवादक कोनो समाधान नहि निकलि सकल। एकर बाद पूरा मामिलाक जिम्मेदारी जदयूक राष्ट्रीय कार्यकारी अध्यक्ष संजय झा केंद्रीय मंत्री राजीव रंजन उर्फ ललन सिंह कें सौंपि देलनि अछि।

जदयू पटना स्नातक निर्वाचन क्षेत्र सं अपन प्रवक्ता आ एमएलसी नीरज कुमार कें प्रत्याशी बनेबाक निर्णय लेने अछि। दोसर दिस, मोकामाक जदयू विधायक अनंत सिंह पार्टीक निर्णय सं अलग ठाढ़ देखाइ पड़ि रहल छथि। ओ जनसुराजक प्रत्याशी डॉ. अनुज सिंह कें समर्थन देबाक संग हुनक पक्ष मे चुनाव प्रचार सेहो शुरू कए देने छथि। एहि स्थिति मे पार्टीक भीतर ई सवाल उठि रहल अछि जे अनंत सिंह कें पार्टीक अधिकृत प्रत्याशीक विरुद्ध खुलि कए जायबाक समर्थन आखिर कतय सं भेटि रहल अछि।

सूत्रक अनुसार, विवाद सोझरेबाक लेल जदयूक शीर्ष नेता सभ अनंत सिंह सं बात केलनि। एहि क्रम मे जदयूक राष्ट्रीय अध्यक्ष नीतीश कुमारक पटना स्थित आवास पर करीब तीन घंटा धरि बैठक चलल। बैठक मे राष्ट्रीय कार्यकारी अध्यक्ष संजय झा आ पार्टीक वरिष्ठ नेता विजेंद्र प्रसाद यादव सेहो उपस्थित छलाह। मुदा बैसारक बादो विवादक कोनो ठोस समाधान नहि निकलि सकल। एकर बाद मामिलाक जिम्मेदारी केंद्रीय मंत्री राजीव रंजन उर्फ ललन सिंह कें देबाक निर्णय लेल गेल। खास बात ई अछि जे नीतीश कुमारक आवास पर भेल एहि बैठक मे ललन सिंह उपस्थित नहि छलाह। पार्टी सूत्रक दावा अछि जे मामिलाक जिम्मेदारी ललन सिंह कें देल गेला सं अनंत सिंह प्रसन्न छथि, जखन कि नीरज कुमार एहि सं परेशान बताओल जा रहल छथि। पार्टीक भीतर ई चर्चा सेहो अछि जे ललन सिंह आ नीरज कुमारक बीच नीक राजनीतिक संबंध अछि।

श्रवण कुमार कहलनि, व्यक्तिगत कारण सं अछि विवाद

जदयू एमएलसी नीरज कुमार आ विधायक अनंत सिंहक बीच चलि रहल राजनीतिक तनातनी पर राज्य सरकारक वरिष्ठ मंत्री आ जदयू नेता श्रवण कुमार कहलनि जे दुनू नेताक बीच मतभेद नीतिगत मुद्दा कें लए कए नहि, बल्कि व्यक्तिगत कारण सं अछि। हुनकर कहब छलनि जे पार्टीक वरिष्ठ नेता पूरा मामिलाक समाधान लेल प्रयासरत छथि आ संवादक माध्यम सं जल्दिये समाधान निकालि लेल जायत।

श्रवण कुमार इहो कहलनि जे एनडीएक प्रत्याशीक रूप मे नीरज कुमार एखन धरि नामांकन नहि केलनि अछि। एहि कारण सं जल्दिये पूरा मामिलाक समाधान निकालि लेल जायत।