10 दिन मे मांगक समाधान नहि भेल तं अनिश्चितकालीन घेरा डालो, डेरा डालो आंदोलनक चेतावनी
जयनगर, समदिया
अखिल भारतीय खेत एवं ग्रामीण मजदूर सभा (खेग्रामस)क आह्वान पर गरीब, भूमिहीन आ महादलित परिवारक 15 सूत्री मांग कें लए कए 13-14 अगस्त कें प्रखंड-अंचल कार्यालय, जयनगरक समक्ष आयोजित दू दिवसीय दिन-रात सत्याग्रह आंदोलन शुक्रदिन समाप्त भए गेल। सत्याग्रहक दोसर दिन सेहो सैकड़ो भूमिहीन, गरीब आ महादलित परिवारक लोक सहभागी भए अपन मांगक समर्थन मे जोरदार आवाज बुलंद कएलनि। सत्याग्रह आंदोलन खेग्रामसक प्रखंड संयोजक तस्लीमक नेतृत्व मे आ भाकपा-मालेक प्रखंड सचिव भूषण सिंहक मौजूदगी मे आयोजित कएल गेल। आंदोलनकारी सभक दिस सं राष्ट्रपति महोदयक नाम 15 सूत्री मांग-पत्र लिखित आवेदनक माध्यम सं प्रखंड विकास पदाधिकारी आ अंचलाधिकारी कें सौंपल गेल। एहि अवसर पर भाकपा-मालेक प्रखंड सचिव भूषण सिंह कहलनि जे भूमिहीन गरीब परिवार कें भूमिक अधिकार आ पर्चाधारी परिवार कें अपन जमीन पर दखल-कब्जा दिअबय सहित सभ 15 सूत्री मांगक स्थानीय प्रशासन गंभीरतापूर्वक समाधान करय। ओ कहलनि जे जं 10 दिनक भीतर मांगक समाधानक दिशा मे ठोस कारबाइ नहि भेल, तं प्रखंडक सभ भूमिहीन आ गरीब परिवार कें गोलबंद कए अनिश्चितकालीन घेरा डालो, डेरा डालो आंदोलन शुरू कएल जाएत। एकर संपूर्ण जिम्मेदारी स्थानीय प्रशासनक होयत। ओ कहलनि जे गरीब सभ कें वर्षो सं हुनकर अधिकार सं वंचित राखल गेल अछि। भूमि, आवास आ अन्य बुनियादी अधिकार लेल भूमिहीन परिवार लगातार संघर्ष कए रहल छथि। प्रशासन कें आंदोलनकारी सभक मांग पर संवेदनशीलताक संग कारबाइ करैत समयबद्ध ढंग सं समस्या सभक समाधान करबाक चाही। प्रखंड विकास पदाधिकारीक अनुपस्थिति मे कल्याण पदाधिकारी सुनील कुमार सत्याग्रह स्थल पर पहुंचि आंदोलनकारी सभ सं वार्ता कएलनि। वार्ताक दौरान प्रशासनक दिस सं मांग सभ पर आवश्यक कारबाइ करबाक आश्वासन देल गेल। एकर बाद आंदोलनकारी सभ हाथ मे तिरंगा लेने दू दिवसीय सत्याग्रह आंदोलन समाप्त कएलनि। वार्ताक दौरान प्रखंड संयोजक तस्लीम, प्रखंड सचिव भूषण सिंह, नरेश ठाकुर, नजाम, फूलो देवी, शिवो देवी, जानकी देवी, सुजीत पासवान, विकास यादव, लक्ष्मण साह, जहाना खातून, रीता देवी, पहाड़ी सदाय, रीता देवी, सुनील पासवान सहित सैकड़ो आंदोलनकारी उपस्थित छलाह। खेग्रामसक नेता सभ स्पष्ट चेतावनी देलनि जे 10 दिनक भीतर मांग सभ पर ठोस समाधान नहि भेल तं आंदोलन कें आरो व्यापक करैत अनिश्चितकालीन घेरा डालो, डेरा डालो आंदोलन शुरू कएल जाएत।
