बेंगलुरु मे शुरू भेल प्रवासी श्रमिक सुविधा केंद्र, मंत्री अरुण शंकर प्रसाद पटना सं ऑनलाइन कएलनि उद्घाटन
पटना।
बिहार सं बाहर रोजगार लेल जाए बला प्रवासी श्रमिक सभ कें कार्यस्थल पर सरकारी योजना आ कल्याणकारी सेवा सभक लाभ उपलब्ध कराबए दिश मे बिहार सरकार एक महत्वपूर्ण पहल केने अछि। बिहार श्रम संसाधन आ प्रवासी श्रमिक कल्याण विभागक दिस सं बेंगलुरु मे प्रवासी श्रमिक सुविधा केंद्र शुरू कएल गेल अछि। एकर ऑनलाइन उद्घाटन बुधदिन पटना स्थित नियोजन भवनक मंत्री कक्ष सं श्रम संसाधन आ प्रवासी श्रमिक कल्याण विभाग-सह-युवा, रोजगार आ कौशल विकास विभागक मंत्री अरुण शंकर प्रसाद कएलनि।
एहि अवसर पर मंत्री अरुण शंकर प्रसाद कहलनि जे बिहारक प्रवासी श्रमिक सभ राज्यक अर्थव्यवस्था आ विकास मे महत्वपूर्ण योगदान दैत छथि। रोजगारक खोज मे पैघ संख्या मे श्रमिक सभ दोसर राज्य जाइत छथि। एहन स्थिति मे सरकारक दायित्व अछि जे हुनका सभ कें कार्यस्थल पर आवश्यक सहायता, मार्गदर्शन आ कल्याणकारी सेवा उपलब्ध कराओल जाए। एहि उद्देश्य सं बेंगलुरु मे सुविधा केंद्रक शुरुआत कएल गेल अछि।
हुनका अनुसार ई केंद्र बिहार आ कर्नाटकक श्रम विभाग सभक बीच नोडल सेंटरक रूप मे काज करत आ दुनू राज्यक बीच श्रमिक कल्याण सं जुड़ल समन्वय कें मजबूत करत। कर्नाटक सरकारक भवन आ अन्य सन्निर्माण कर्मकार कल्याण बोर्ड सुरक्षा भवन मे एहि केंद्र लेल स्थान उपलब्ध करौने अछि।
मंत्री मीडिया सं बातचीत मे बतौलनि जे केंद्र पर बिहारक प्रवासी श्रमिक सभ कें कर्नाटक भवन आ अन्य सन्निर्माण कर्मकार कल्याण बोर्ड मे पंजीकरण कराबए मे सहायता देल जाएत। एहि सं श्रमिक सभ बोर्डक विभिन्न कल्याणकारी योजना सभक लाभ उठा सकताह।
एकर अतिरिक्त कार्यस्थल सं जुड़ल विवाद, स्वास्थ्य आ सुरक्षा संबंधी समस्या तथा आकस्मिक परिस्थिति मे सेहो सहायता उपलब्ध कराओल जाएत। श्रमिक सभ कें कानूनी अधिकार, वेतन भुगतान सं जुड़ल समस्या आ नव श्रम कानून सभक जानकारी देबाक लेल विधिक सहायता सेहो देल जाएत।
भाषा संबंधी कठिनाइ सभ दूर करबाक आ रोजगारक नव अवसरक जानकारी उपलब्ध कराबए लेल एहि केंद्र कें सूचना सहायता केंद्रक रूप मे विकसित कएल गेल अछि। केंद्रक संचालन लेल बिहार सरकार श्रम प्रवर्तन पदाधिकारी आकाश कुमार कें प्रतिनियुक्त केने अछि। स्थानीय स्तर पर सहायता लेल दू डाटा एंट्री ऑपरेटर आ एक ऑफिस बॉयक सेवा सेहो उपलब्ध कराओल गेल अछि।
अरुण शंकर प्रसाद कहलनि जे सरकारक उद्देश्य प्रवासी श्रमिक सभ कें सुरक्षा, सम्मान आ हुनकर अधिकार सुनिश्चित करैत सामाजिक सुरक्षा दायराक भीतर आनब अछि। हुनका अनुसार मुख्यमंत्री सम्राट चौधरीक मार्गदर्शन मे शुरू कएल गेल ई पहल समृद्ध बिहारक संकल्पना कें मजबूती देत आ प्रधानमंत्री नरेंद्र मोदीक विकसित भारतक संकल्प पूरा करबा मे सहयोगी बनत।
मंत्री कहलनि जे सरकार आगू चलि देशक अन्य राज्य सभ मे सेहो एहन प्रवासी श्रमिक सुविधा केंद्र स्थापित करबाक विषय पर विचार कए रहल अछि, जाहि सं बिहार सं बाहर काज कएनिहार श्रमिक सभ कें कोनो प्रकारक परेशानीक स्थिति मे शीघ्र सहायता उपलब्ध भए सकए।
