सहरसा, समदिया
कोसी एक्सप्रेस द बर्निंग ट्रेन बनबा सं लेल बाल-बाल बचि गेल। कोसी एक्सप्रेसक एसी बोगी मे अनचोके आगि लागि गेल, जाहि सं ट्रेन मे सवार यात्री सभक बीच दहशत पसरि गेल। भयभीत यात्री सभ प्राण बचयबाक लेल ट्रेन सं कूदय लगलाह आ चारूकात अफरातफरी मचि गेल।
बताओल जा रहल अछि जे पूर्णिया कोर्ट सं सहरसा होइत हटिया (रांची) दिस जा रहल कोसी एक्सप्रेस बुधदिन बर्निंग ट्रेन बनबा सं बचि गेल। तेज गति सं चलि रहल ट्रेनक थर्ड एसी इकोनॉमी कोच एम-2 मे सोनवर्षा कचहरी आ सिमरी बख्तियारपुर स्टेशनक बीच आगि लागि गेल।
कोचक पहिया लग सं आगिक धधरा उठैत आ भीतर धुआं भरैत देखि यात्री सभ भयभीत भए गेलाह। सिमरी बख्तियारपुर स्टेशन पर भोरक करीब 5:30 बजे ट्रेन रुकिते कतेको यात्री कोच सं कूदि कए अपन प्राण बचौलनि। मुदा एहि सं पहिने फाटक संख्या-19 पर तैनात गेटमैन ट्रेनक एकटा कोच सं धुआं निकलैत आ पहियाक नीचां सं आगिक धधरा उठैत देखलनि। ओ तुरंत स्टेशन मास्टर कें दूरभाष पर सूचना देलनि।
सूचना भेटिते स्टेशन मास्टर, आरपीएफ जवान, ट्रेनक चालक, सहायक चालक आ गार्ड घटनास्थल पर पहुंचि अग्निशामक यंत्रक सहायता सं आगि मिझयबाक प्रयास कयलनि। मुदा आगि नहि मिझेला पर भोर 5:35 बजे अग्निशमन विभाग कें सूचना देल गेल। करीब दस मिनट बाद अग्निशमन दस्ता दमकल गाड़ी लए कए पहुंचल आ पानि छीटि कए आगि पर भोर 5:57 बजे काबू पाबि लेल गेल।
आगि पर नियंत्रण पाबि लेलाक बाद सभ गोटे राहतिक सांस लेलनि। करीब 6 बजे चालक, सहायक चालक, स्टेशन मास्टर आ गार्ड ट्रेन कें आगू-पाछां कए जांच-पड़ताल कयलनि। जांच मे सभ किछु ठीक पाओल गेलाक बाद ट्रेन भोर 6:13 बजे अपन गंतव्य दिस प्रस्थान कयलक। एहि बीच स्टेशन पर अफरातफरीक स्थिति बनल रहल। घटनाक सूचना भेटला पर आरपीएफ निरीक्षक धनंजय कुमार सहित अन्य अधिकारी सेहो स्टेशन पर पहुंचि घटनाक निरीक्षण केलनि।
