भागलपुर विक्रमशिला सेतु पर आवागमन मे नहि होयत कठिनाइ; सरकार आ प्रशासन करत व्यवस्था, कहलनि ऊर्जा मंत्री
भागलपुर। भागलपुर मे गंगा नदी पर स्थित लाइफलाइन कहलाबयबला क्षतिग्रस्त विक्रमशिला सेतु केर पुनर्स्थापन (मरम्मतिक) काज 29 अगस्त सं शुरू होयत। एहि दौरान सेतु पर आवागमन पूरी तरह बंद रहत। आगामी दिन मे दुर्गापूजा, कालीपूजा, छठ महापर्व आ गंगाक जलस्तर बढ़ला सं संभावित बाढ़िक स्थिति कें देखैत लोकक समक्ष आवागमनक पैघ संकट ठाढ़ होयबाक आशंका अछि। मुदा बिहार सरकारक ऊर्जा मंत्री शैलेश कुमार उर्फ बुलो मंडल कहलनि जे सेतु केर मरम्मतिक काजक दौरान आम लोक कें कोनो तरहक कठिनाइ नहि होय देल जाएत। सरकार आ जिला प्रशासन वैकल्पिक आवागमन लेल पूरा आ पुख्ता व्यवस्था करत।
ई बात ऊर्जा मंत्री स्थानीय एकटा होटल मे नागरिक विकास समिति सहित विभिन्न सामाजिक संगठन दिस सं आयोजित अभिनंदन समारोह मे पत्रकार सभ सं बातचीतक दौरान कहलनि।
त्योहार आ बाढ़िक मौसम मे पुल बंद होयबाक सवाल पर मंत्री कहलनि, “बाढ़िक समय अछि आ हम सभ स्थिति पर पूरा नजरि रखने छी। पर्व-त्योहार त’ अबैत रहैत अछि, मुदा सुरक्षा आ सेतुक पुनर्निर्माण सेहो बहुत जरूरी अछि। सरकार आ स्थानीय प्रशासन पूरी तरह सतर्क अछि। लोकक सुविधा लेल सभ जरूरी कदम उठाओल जाएत।”
वैकल्पिक व्यवस्था केर रूप मे पीपा पुल बनेबाक चर्चा कें खारिज करैत ओ स्पष्ट कएलनि जे सावन-भादो आ बाढ़िक मौसम मे तेज जलप्रवाहक कारण पीपा पुल हटा लेल जाइत अछि। एहि कारण एहि मौसम मे पीपा पुलक निर्माण तकनीकी रूप सं संभव नहि अछि।
ऊर्जा मंत्री कहलनि जे विक्रमशिला सेतु क्षतिग्रस्त भेल अछि, तेँ एकर स्थायी सुधार आ तकनीकी पुनर्स्थापन मे समय लागब स्वाभाविक अछि। ओ याद करौलनि जे पूर्व मे जखन पुल क्षतिग्रस्त भेल छल, तखन सरकार तत्परता देखबैत रिकॉर्ड 28 दिनक भीतर बेली ब्रिज तैयार करौने छल आ आवागमन बहाल कएल गेल छल।
ओ कहलनि जे वर्तमान मे बेली ब्रिजक माध्यम सं मात्र छोट वाहन सभक परिचालन भ’ रहल अछि। 29 अगस्त सं शुरू होयबला पुनर्स्थापन काज कें तेजी सं पूरा कए नवंबर धरि सेतु कें पूरी तरह दुरुस्त करबाक लक्ष्य अछि। एकर बाद भारी आ पैघ वाहन सभक नियमित परिचालन सेहो सुचारु भए जाएत।
प्रेस वार्तासं पहिने ऊर्जा मंत्री कहलनि जे नागरिक विकास समिति आ अन्य प्रबुद्ध सामाजिक संगठनक प्रतिनिधि सभ सं भागलपुरक समग्र विकासक रोडमैप पर सकारात्मक चर्चा भेल अछि। सरकार भागलपुरक आधारभूत संरचना आ नागरिक सुविधा कें मजबूत करबाक लेल पूरी तरह प्रतिबद्ध अछि।
अभिनंदन समारोह मे जदयू आ भाजपा केर जिलाध्यक्ष, एनडीएक कतेको वरिष्ठ कार्यकर्ता, नागरिक विकास समितिक अध्यक्ष रमण कर्ण, सचिव सत्यनारायण प्रसाद, रामप्रकाश गुप्ता, एजाज अली रोज सहित शहरक विभिन्न सामाजिक संगठनक गणमान्य सदस्य उपस्थित छलाह।
