भरत भूषण तिवारीक परिवार कें आर्थिक सहायता आ एक परिजन कें नौकरी देत सरकार : मुख्यमंत्री सम्राट चौधरी
पटना, समदिया
बिहारक चर्चित भरत भूषण तिवारीक कथित पुलिस मुठभेड़ मे भेल मृत्यु प्रकरण मे मुख्यमंत्री सम्राट चौधरी बृहस्पतिदिन पैघ घोषणा केलनि। हुनका अनुसार दिवंगत भरत भूषण तिवारीक परिवार कें आर्थिक सहायता देल जाएत आ परिवारक एक सदस्य कें सरकारी नौकरी प्रदान कएल जाएत।
मुख्यमंत्री कहलनि जे न्यायिक जांचक अंतरिम रिपोर्टक आधार पर बिहार सरकार ई निर्णय लेने अछि। एहि संबंध मे जानकारी हुनका सोशल मीडिया मंचक माध्यम सं साझा केलनि।
उल्लेखनीय अछि जे ई मामिला 17 जूनक भोर मे भोजपुर जिलाक शाहपुर थाना क्षेत्रक बिलौटी गाम मे भेल पुलिस मुठभेड़ सं जुड़ल अछि। बिलौटी निवासी काशीनाथ तिवारीक पुत्र भरत भूषण तिवारी कें पुलिस कारबाइक दौरान पांच गोली लागबाक बाति सामने आएल छल। गंभीर रूप सं घायल भरत भूषण कें इलाज लेल अस्पताल लए जाएल गेल छल, जतए बाद मे हुनकर मृत्यु भए गेल।
घटनाक बाद भरत भूषणक परिजन सभ आ स्थानीय लोक सभ पुलिस कारबाइ पर गंभीर प्रश्न उठौने छलाह। परिजन सभक आरोप छल जे भरत भूषण पुलिसक समक्ष आत्मसमर्पण कए देने छलाह, मुदा एकरा बावजूद हुनका गोली मारल गेल।
घटनाक बाद क्षेत्र मे तनावक स्थिति उत्पन्न भए गेल छल आ लोक सभ विरोध-प्रदर्शन सेहो केने छलाह। एहि संबंध मे प्राथमिकी दर्ज कएल गेल छल।
विवाद बढ़ला आ निष्पक्ष जांचक मांग उठला बाद राज्य सरकार संपूर्ण घटनाक्रमक जांच लेल न्यायिक आयोगक गठन केने छल। आयोग कें मुठभेड़क परिस्थिति, घटनाक्रम आ एकरा सं जुड़ल तथ्य सभक जांचक जिम्मेदारी देल गेल अछि।
मुख्यमंत्रीक ताजा घोषणा कें न्यायिक जांचक अंतरिम रिपोर्ट सं जोड़ि कए देखल जा रहल अछि। सरकारक एहि निर्णय सं पीड़ित परिवार कें किछु राहति भेटबाक आशा व्यक्त कएल जा रहल अछि।
भरत भूषण तिवारी प्रकरण कें लए बिहारक राजनीति सेहो गर्म रहल अछि। विपक्षी दल सभ पुलिस कारबाइ आ कानून-व्यवस्थाक मुद्दा पर सरकार पर निशाना साधने छल, जखनकि सरकारक दिस सं निष्पक्ष जांच कराबएबाक बाति कहल गेल छल।
आब न्यायिक जांचक अंतरिम रिपोर्टक आधार पर आर्थिक सहायता आ परिवारक एक सदस्य कें सरकारी नौकरी देबाक घोषणा सं ई मामिला एक बेर फेर राजनीतिक आ प्रशासनिक चर्चाक केंद्र मे आबि गेल अछि।
