हाजीपुर, समदिया
बिहारक वैशाली जिला मे बृहस्पतिदिन भोर अपराधी सभ एक ठेकेदारक गोली मारि हत्या कए देलक। ई घटना हाजीपुर सदर थाना क्षेत्रक दिग्घी पश्चिम इलाका मे भेल। मृतकक पहचान दिग्घी पश्चिम निवासी ठेकेदार रामनरेश रायक रूप मे भेल अछि।
घटनाक बाद क्षेत्र मे सनसनी फैलि गेल, जखनकि परिजन सभक कानय बिलखब सं वातावरण गमगीन भए गेल। आक्रोशित स्थानीय लोक सभ सड़क जाम कए अपराधी सभक शीघ्र गिरफ्तारीक मांग केलनि।
पुलिसक अनुसार रामनरेश राय भोर मे मॉर्निंग वॉक लेल घर सं निकलल छलाह। घर सं किछु दूर पहुंचिते दू मोटरसाइकिल पर सवार चारि अपराधी ओतए पहुंचल आ हुनका पर अंधाधुंध गोलीबारी शुरू कए देलक।
गोली लगला सं रामनरेश राय गंभीर रूप सं घायल भए सड़क पर खसि पड़लाह। गोलीक आवाज सुनि आसपासक लोक सभ घटनास्थल पर पहुंचल आ हुनका आनन-फानन मे स्थानीय अस्पताल लए गेल, जतए चिकित्सक सभ हुनका मृत घोषित कए देलनि।
वैशालीक पुलिस अधीक्षक शुभांक मिश्रा कहलनि जे रामनरेश राय मॉर्निंग वॉक लेल निकलल छलाह। एहि बीच दू बाइक पर सवार चारि बदमाश पहुंचि हुनका पर फायरिंग कएलक। हुनका अनुसार रामनरेश राय कें चारि-पांच गोली लागल अछि।
पुलिस घटनास्थल आ आसपास लागल सीसीटीवी कैमरा सभक फुटेज खंगालि रहल अछि। अपराधी सभक पहचान कए गिरफ्तारी लेल कारबाइ जारी अछि।
प्रारंभिक जांच मे लगभग एक मास पूर्वक जमीन विवाद सं जुड़ल मामिला सामने आबएबाक बात कहल जा रहल अछि। हालांकि हत्याक वास्तविक कारण एखन धरि स्पष्ट नहि भए सकल अछि।
पुलिस पुरान रंजिश, जमीन-जायदाद विवाद आ अन्य संभावित कारण सभक जांच कए रहल अछि।
घटनाक बाद आक्रोशित स्थानीय लोक सभ सड़क जाम कए अपराधी सभक शीघ्र गिरफ्तारीक मांग केलनि। पुलिस अधिकारी सभ घटनास्थल पर पहुंचि लोक सभ कें समझौलनि आ शीघ्र कारबाइक भरोस देलनि।
दिग्घी नया टोला आ आसपासक इलाका मे तनावपूर्ण स्थिति कें देखैत अतिरिक्त पुलिस बलक तैनाती कएल गेल अछि। पुलिस लोक सभ सं शांति बना राखबाक अपील कए रहल अछि।
फिलहाल पुलिस सीसीटीवी फुटेजक आधार पर हमलावर सभक पहचान आ गिरफ्तारी लेल छापेमारी आ जांच अभियान मे जुटल अछि।
