पंचायत समिति बैसार मे जनसमस्याक लेल सदस्य सभ जतौलनि रोष
मनरेगा सड़क, स्वास्थ्य, शिक्षा, आंगनबाड़ी आ नल-जल योजनाक मुद्दा उठल
सिमरी बख्तियारपुर, सहरसा/समदिया
सिमरी बख्तियारपुर प्रखंड मुख्यालय स्थित सभागार मे बृहस्पति कें प्रखंड पंचायत समितिक बैसार आयोजित कएल गेल। अध्यक्षता प्रखंड प्रमुख शबनम कुमारी कएलनि, जखन कि संचालन बीडीओ मोहन कुमार सिंह कएलनि। बैसार मे विभिन्न पंचायत सं जुड़ल जनसमस्या संग स्वास्थ्य, शिक्षा, नल-जल, मनरेगा आ प्रशासनिक स्तर पर कएल जा रहल कथित उदासीनताक मुद्दा प्रमुखता सं उठल। सदस्य सभ कतेको मामिला मे रोष जतबैत तत्काल कारबाइक मांग कएलनि। रायपुरा पंचायतक पंचायत समिति सदस्य अरविंद सिंह कुशवाहा अंचलाधिकारीक कार्यशैली पर रोष जतौलनि। ओ जनप्रतिनिधि सभक समस्या कें गंभीरतापूर्वक लेबाक आ अधिकारी तथा पंचायत प्रतिनिधि सभक बीच नीक समन्वय बनयबाक मांग कएलनि। कांठो पंचायतक पंसस परितोष कुमार सिंह मनरेगा योजनाक अंतर्गत बनल सड़क कें दबंग सभ द्वारा उखाड़ि कए क्षतिग्रस्त करबाक मामिला उठौलनि। ओ दोषी सभ पर कारबाइ करबाक आ सड़कक मरम्मत कराबयक मांग कएलनि। सोनपुरा पंचायतक पंसस राजेश कुमार सादा प्राथमिक स्वास्थ्य केंद्र मे प्रसव आ आपातकालीन सेवा शुरू नहि होयबाक मुद्दा उठौलनि। ओ कहलनि जे करोड़ो रुपैयाक लागत सं भवन बनलाक बावजूद लोक कें एहि सेवा सभक लाभ नहि भेटि रहल अछि।
विद्यालय मे कोठलीक कमीक मुद्दा
सिटानाबाद दक्षिणीक वार्ड संख्या 10 स्थित उत्क्रमित मध्य विद्यालय मे करीब 450 बच्चा लेल मात्र दूटा कमरा रहबाक मामिला सामने आयल। सकरौली मध्य विद्यालय मे सेहो कमरा कमी होयबाक बात कहल गेल। सदस्य सभ अतिरिक्त भवन निर्माण कराबयक मांग कएलनि।
नल-जल योजना मे लापरवाही पर रोष
सिटानाबाद दक्षिणी मे एकटा वार्ड मे दूटा आंगनबाड़ी केंद्र आ दोसर वार्ड मे एकोटा आंगनबाड़ी केंद्र नहि होयबाक मुद्दा उठल। सोनपुरा पंचायत मे 13 मे सं मात्र पांचटा वार्ड मे नल-जल योजनाक पाइप बिछाओल गेल अछि। एहि पर सेहो सदस्य सभ रोष जतौलनि आ सभ वार्ड मे योजना पूरा करबाक मांग कएलनि। बैसार मे कार्यक्रम पदाधिकारी भोला दास, अंचलाधिकारी नवीन कुमार, बीपीआरओ, डॉ. आशीष कुमार, उप प्रमुख धर्मेंद्र राय सहित कतेको पंचायत प्रतिनिधि आ पदाधिकारी उपस्थित छलाह।
=======================================================
