दरभंगा। मैथिली भाषा मे शिक्षक बनबाक प्रतीक्षा कए रहल अभ्यर्थी सभक लेल पैघ खबरि अछि। शिक्षक भर्ती परीक्षा (टीआरई)-4 मे मैथिली शिक्षकक रिक्त पद शामिल कएल जाएत। एहि सं मैथिली विषय सं शिक्षक बनबाक तैयारी कए रहल अभ्यर्थी सभक लेल रोजगारक नव अवसरक बाट खुलत।
शिक्षा मंत्री मिथिलेश तिवारी आवश्यक रिक्तिक आकलन आ रोस्टरक काज पूरा कए संशोधित अधियाचना बिहार लोक सेवा आयोग (बीपीएससी) कें पठेबाक निर्देश देने छथि।
सांसद सह लोकसभा मे पार्टी सचेतक डॉ. गोपालजी ठाकुर बतौलनि जे 5 अगस्त कें ओ मुख्यमंत्री सम्राट चौधरी आ शिक्षा मंत्री मिथिलेश तिवारी सं भेंट कए टीआरई मे मैथिली भाषा शिक्षकक पद निर्धारित करबाक आग्रह केने छलाह। एहि बाद शिक्षा मंत्री सरकारक दिस सं उठाओल गेल कदमक जानकारी देलनि।
शिक्षा मंत्रीक निर्देश अनुसार मैथिली सहित अन्य भाषा मे आवश्यक रिक्तिक आकलन कएल जाएत। रोस्टरक काज पूरा कए संबंधित पदक अधियाचना शीघ्र बीपीएससी कें पठाओल जाएत। एहि रिक्त पद सभ कें आगामी शिक्षक नियुक्ति प्रक्रिया अर्थात टीआरई-4 मे शामिल कए विज्ञापन प्रकाशित करबाक प्रक्रिया आगू बढ़ाओल जाएत।
मैथिली शिक्षकक रिक्त पद कें टीआरई-4 मे शामिल करबाक निर्णयक पुष्टि 16 अगस्त कें शिक्षा विभागक बैठक मे सेहो कएल गेल। एहि सं मैथिली विषय सं शिक्षक बनबाक तैयारी कए रहल अभ्यर्थी सभक बीच उम्मीद जगल अछि।
टीआरई-4 लेल 32,388 शिक्षक पदक अधियाचना पहिनहि बीपीएससी कें पठाओल जा चुकल अछि। आब छूटल अन्य विषयक रिक्त पद सभ कें सेहो एहि मे जोड़ल जाएत। एकर बाद संशोधित अधियाचना आयोग कें पठाओल जाएत।
सांसद डॉ. ठाकुर सरकारक एहि कदमक सराहना कएलनि। ओ कहलनि जे मुख्यमंत्री आ शिक्षा मंत्रीक पहल सं मैथिली भाषा माध्यम सं प्रत्येक कक्षा मे शिक्षकक बहालीक बाट स्पष्ट भेल अछि। एहि सं मैथिली भाषा विषयक अभ्यर्थी सभक लेल रोजगारक नव अवसर उपलब्ध होएबाक उम्मीद अछि।
