एनएच-107 पर भेल हादसा, पुलिस शव पोस्टमार्टम लेल पठौलनि
301
सिमरी बख्तियारपुर, सहरसा/समदिया
सिमरी बख्तियारपुर थाना क्षेत्रक बलवाहाट-सिमरी बख्तियारपुर एनएच-107 पर भौरा गामक समीप बुध देर सांझ अज्ञात वाहनक ठोकर सं बाइक सवार एक व्यक्ति गंभीर रूप सं घायल भए गेलाह। स्थानीय लोक सभ आनन-फानन मे हुनका इलाज लेल सिमरी बख्तियारपुर अनुमंडलीय अस्पताल पहुंचौलनि, जतय चिकित्सक जांचक बाद हुनका मृत घोषित कए देलनि। मृतकक पहचान बलवाहाट थाना क्षेत्रक सोनपुरा पंचायत अंतर्गत बसतपुर गाम निवासी 55 वर्षीय दीपनारायण यादवक रूप मे भेल अछि। घटना केर सूचना भेटिते स्वजन अस्पताल पहुंचलाह। मृत्यु केर खबर सुनिते परिवार मे कोहराम मचि गेल आ परिजनक रो-रो कए बुरा हाल भए गेल। बताओल जाइत अछि जे दीपनारायण यादव बुध कें बाइक सं कोनो काजक सिलसिला मे सिमरी बख्तियारपुर आयल छलाह। देर सांझ काज समाप्त कए ओ बाइक सं अपन घर बसतपुर लौटि रहल छलाह। एहि क्रम मे एनएच-107 पर भौरा गामक समीप विपरीत दिशा सं आबि रहल अज्ञात वाहन हुनकर बाइक मे जोरदार ठोकर मारि देलक। हादसा मे ओ सड़क पर खसि कए गंभीर रूप सं घायल भए गेलाह। घटना कए बाद आसपासक लोक घटनास्थल पर जुटि गेलाह आ घायल कें तत्काल अनुमंडलीय अस्पताल पहुंचौलनि। मुदा इलाज शुरू होयबाक किछुए देर बाद चिकित्सक हुनका मृत घोषित कए देलनि। घटनाक सूचना भेटलाक बाद बख्तियारपुर थाना पुलिस अधिकारी अमरजीत कुमार सिंह आ रामनाथ पासवान अस्पताल पहुंचलाह। पुलिस आवश्यक कागजी प्रक्रिया पूरा कए शव कें पोस्टमार्टम लेल सदर अस्पताल पठा देलक। अज्ञात वाहनक पहचान लेल पुलिस आसपासक लोक सं पूछताछ कए रहल अछि।
