बीडब्ल्यूएफ विश्व चैंपियनशिप: सेमीफाइनल मे त्रिषा-गायत्री केर जोड़ी कें भेटल हारि, कांस्य पदक सं करए पड़ल संतोष

नई दिल्ली। बीडब्ल्यूएफ विश्व चैंपियनशिप 2026 मे त्रिषा जॉली आ गायत्री गोपीचंद केर जोड़ी कें कांस्य पदक सं संतोष करए पड़ल अछि। महिला डबल्सक सेमीफाइनल मोकाबला मे शनिदिन भारतीय जोड़ी कें चीनक लियू शेंगशू आ तान निंग केर जोड़ी सं हारिक सामना करए पड़ल। 70 मिनट सं बेसी चलल एहि मोकाबला मे चीनी जोड़ी त्रिषा-गायत्री कें 18-21, 21-13, 21-8 सं पराजित कए फाइनल मे अपन स्थान पक्का कएलक।
एहि हारक संग त्रिषा आ गायत्रीक जोड़ी महिला डबल्सक फाइनल मे पहुंचनिहार पहिल गैर वरीयता प्राप्त जोड़ी बनबाक उपलब्धि सं चूकि गेल। मुदा सेमीफाइनल धरि पहुंचबाक संग हुनका सभ भारत लेल कांस्य पदक पक्का कए देने छलीह। ई विश्व चैंपियनशिप मे महिला डबल्स मे भारतक 2011क बाद पहिल पदक अछि।
सेमीफाइनल मुकाबलक शुरुआत त्रिषा आ गायत्रीक जोड़ी शानदार ढंग सं कएलनि। भारतीय जोड़ी चीनी जोड़ी पर लगातार दबाव बनबैत 7-2 केर बढ़त बना लेने छल। मुदा तकर बाद लियू शेंगशू आ तान निंग वापसी करैत लगातार अंक हासिल कएलनि आ ब्रेक धरि 11-7 केर बढ़त बना लेलनि। भारतीय जोड़ी फेर वापसी कएलक आ पहिल गेम 21-18 सं अपन नाम कए लेलक।
पहिल गेम हारलाक बाद चीनी जोड़ी दोसर गेमक शुरुआत सं हावी देखल गेल। ओ सभ 3-0 केर बढ़त बना लेलनि। त्रिषा आ गायत्री वापसी करैत ब्रेक धरि 9-8 केर बढ़त बना लेलनि। मोकाबला 12-12 केर बराबरी पर पहुंचल, मुदा एकर बाद चीनक जोड़ी लगातार आठ अंक हासिल कए गेम 21-13 सं जीत लेलनि।
तेसर गेम मे चीनी जोड़ी पूरा तरहे हावी रहल। ब्रेक धरि ओ सभ 11-5 केर बढ़त बना लेलनि। एकर बाद लियू शेंगशू-तान निंग लगातार 8 अंक हासिल कए फाइनल केर टिकट पक्का कए लेलनि। तेसर गेम 21-8 सं जीतबाक संग भारतीय जोड़ीक अभियान समाप्त भए गेल।
त्रिषा आ गायत्री एहि चैंपियनशिप मे ऐतिहासिक प्रदर्शन करैत महिला डबल्स मे भारतक 15 वर्षक पदकक इंतजार समाप्त कएलनि। क्वार्टर फाइनल मे हुनका सभ चारिम वरीयता प्राप्त चीनक जिया यी फान आ झांग शू शियान कें हरौने छलीह।