कर्पूरी चौक सं लोहिया चौक धरि निकलल यात्रा मे जनप्रतिनिधि लेलनि हिस्सा
दरभंगा, समदिया
कला, संस्कृति एवं युवा विभाग, बिहार आ जिला प्रशासन, दरभंगाक संयुक्त तत्वावधान मे हर घर तिरंगा अभियानक अंतर्गत बुधदिन शहर मे भव्य तिरंगा यात्राक आयोजन कएल गेल। यात्रा मे पैघ संख्या मे जनप्रतिनिधि, पदाधिकारी, युवा आ आम नागरिक हाथ मे राष्ट्रध्वज लए शामिल भेलाह। पूरा बाट मे देशभक्ति आ राष्ट्रप्रेमक वातावरण बनल रहल। कार्यक्रमक शुरुआत कर्पूरी चौक स्थित जननायक कर्पूरी ठाकुरक प्रतिमापर माल्यार्पणक संग भेल। तकर बाद कर्पूरी चौक सं तिरंगा यात्रा प्रारंभ भए बेंता चौक, लहेरियासराय टावर होइत लोहिया चौक पहुंचल। लहेरियासराय टावर स्थित महात्मा गांधीजीक प्रतिमापर पुष्पांजलि अर्पित कएल गेल। लोहिया चौकपर संबोधनक बाद कार्यक्रमक समापन भेल। कार्यक्रमक शुभारंभ राष्ट्रीय गीत आ राष्ट्रगान सं आ समापन बिहार गीतक संग कएल गेल। एहि अवसर पर पथ निर्माण विभाग, बिहार सरकारक मंत्री सह दरभंगाक प्रभारी मंत्री कुमार शैलेंद्र कहलनि जे देश कें आजाद कराबय मे हजारो स्वतंत्रता सेनानी आ सैनिक अपन सर्वस्व न्योछावर कए देने छलाह। हुनक त्याग आ बलिदानक कारण आइ देशवासी स्वतंत्र भारत मे राष्ट्रीय ध्वज कें गर्वक संग फहरा रहल छथि। देशभरि मे करोड़ो लोकक तिरंगा यात्रा मे सहभागिता राष्ट्रप्रेम आ राष्ट्रीय एकताक भावना कें प्रदर्शित करैत अछि। नगर विधायक सह भाजपा प्रदेश अध्यक्ष संजय सरावगी कहलनि जे प्रधानमंत्री नरेंद्र मोदीक आह्वानक बाद हर घर तिरंगा अभियान व्यापक जनचेतनाक आंदोलनक रूप लए लेने अछि। ओ कहलनि जे हर घर तिरंगा, हर गाम तिरंगा, हर प्रतिष्ठान तिरंगा केर संदेश जन-जन धरि पहुंचेनाइ आवश्यक अछि। राष्ट्रीय पर्वक अवसर पर प्रत्येक नागरिक कें अपन घर आ प्रतिष्ठान पर तिरंगा फहरा कए राष्ट्रध्वजक प्रति सम्मान आ स्वाभिमानक भावना प्रकट करबाक चाही।
