फोटो 1202
भारतीय क्रिकेट टीम गाले इंटरनेशनल स्टेडियम मे खेलल गेल टेस्ट मैच मे श्रीलंका कें 165 रन सं हरा देलक। मानव सुथारक घातक गेंदबाजीक बदौलत टीम इंडिया श्रीलंका कें पांचम दिन दोसर सेशन मे दोसर पारी मे 206 रन पर समेटि गाले टेस्ट अपना नाम कए लेलक। जीतक संग 2 मैचक सीरीज मे टीम इंडिया 1-0 सं आगू भए गेल अछि।
श्रीलंका कें चारिम पारी मे जीत लेल 372 रनक लक्ष्य भेटल छल। टीमक शुरुआत बहुत खराब रहल। श्रीलंका अपन शुरुआती 4 विकेट मात्र 47 रन पर गमा देलक। इएह समय छल, जखन टीमक हार तय भए गेल छल। मुदा कप्तान धनंजय डी सिल्वा (59) आ पहिल पारीक शतकवीर सोनल दिनुशा 84 रनक पारी खेलि टीमक हार किछु समय लेल टारि देलनि, मुदा हुनकर ई प्रयास पर्याप्त नहि छल। दूनूक आउट होयबाक संगहि श्रीलंकाक पारी 77.4 ओवर मे 206 रन पर सिमटि गेल आ 165 रनक पैघ भेद सं मैच गमा देलक।
युवा गेंदबाज मानव सुथार भारत लेल दोसर पारीक हीरो रहलाह। सुथार 23.4 ओवर मे 55 रन दए 6 विकेट लेलनि। एकर अतिरिक्त प्रसिद्ध कृष्णा 2 आ सिराज-जडेजा 1-1 विकेट लेलनि।
भारतीय टीम टॉस जीतिकए पहिने बल्लेबाजी करैत देवदत्त पड्डिकलक 167, केएल राहुलक 82 आ ध्रुव जुरेलक 51 रनक मदति सं 462 रन बनौने छल।
श्रीलंका पहिल पारी मे सोनल दिनुशाक 100 आ निरोशन डिकवेलाक 80 रनक पारीक बावजूद 284 रन पर सिमटि गेल छल आ 178 रन सं पाछां छल।
भारतक दोसर पारी 193 रन पर सिमटि गेल छल। ऋषभ पंत 66 रन बनेने छलाह। 178 रनक बढ़त पर भारत श्रीलंका कें जीत लेल 372 रनक लक्ष्य देने छल।
सीरीजनक दोसर टेस्ट 23 अगस्त सं कोलंबो मे खेलल जाएत।
