आईसीसी टेस्ट रैंकिंग: बुमराह कें पछाड़ि स्टार्क बनलाह नंबर वन गेंदबाज, बल्लेबाजी मे ऋषभ पंत कें लाभ

 

 

अंतरराष्ट्रीय क्रिकेट परिषद (आईसीसी) बुध दिन टेस्ट क्रिकेटरसभक रैंकिंग जारी कएलक। गेंदबाजसभक नव रैंकिंग मे ऑस्ट्रेलियाक तेज गेंदबाज मिचेल स्टार्क भारतीय तेज गेंदबाज जसप्रीत बुमराह कें पछाड़ैत पहिल स्थान हासिल कए लेलनि।

बांग्लादेशक विरुद्ध हालहि मे समाप्त भेल टेस्ट सीरीज मे मिचेल स्टार्क 12 विकेट लेलनि आ प्लेयर ऑफ द सीरीज रहलाह। एहि प्रदर्शनक बदौलत आईसीसीक टेस्ट गेंदबाजसभक नव रैंकिंग मे स्टार्क दू स्थानक छलांग लगबैत पहिल स्थान पर पहुंचि गेलाह। जसप्रीत बुमराह इंजरीक कारण श्रीलंकाक विरुद्ध भारतक दू टेस्ट मैचक सीरीजक हिस्सा नहि छथि। एकर असर हुनक रैंकिंग पर पड़ल अछि। ओ एक स्थान नीचां खसि दोसर स्थान पर चलि गेलाह।

न्यूजीलैंडक तेज गेंदबाज मैट हेनरी कें एक स्थानक नोकसान भेल अछि। ओ तेसर स्थान पर आबि गेलाह। ऑस्ट्रेलियाक कप्तान पैट कमिंस कें एक स्थानक लाभ भेल अछि। ओ चारिम स्थान पर आबि गेलाह।

दक्षिण अफ्रीकाक मार्को जानसेन एक स्थानक नोकसानक संग पांचम, दक्षिण अफ्रीकाक कगिसो रबाडा एक स्थानक लाभक संग छठम आ ऑस्ट्रेलियाक स्कॉट बोलैंड एक स्थानक नोकसानक संग सातम स्थान पर छथि। पाकिस्तानक नोमान अली आठम, ऑस्ट्रेलियाक जोश हेजलवुड नवम आ ऑस्ट्रेलियाक नाथन लियोन दू स्थान ऊपर चढ़ि दसमा स्थान पर पहुंचि गेलाह।

पाकिस्तानक विरुद्ध पहिल टेस्ट मे शानदार प्रदर्शन कएनिहार इंग्लैंडक तेज गेंदबाज ओली रॉबिनसन आ जोश टंग कें लाभ भेल अछि। रॉबिनसन 15 स्थानक छलांग लगबैत 11म आ टंग 16 स्थानक छलांग लगबैत 17म स्थान पर पहुंचि गेलाह।

टेस्ट बल्लेबाजसभक रैंकिंग पर नजरि देल जाए तं शीर्ष पांच मे कोनो बदलाव नहि भेल अछि। इंग्लैंडक हैरी ब्रूक पहिल, इंग्लैंडक जो रूट दोसर, ऑस्ट्रेलियाक स्टीव स्मिथ तेसर, ऑस्ट्रेलियाक ट्रेविस हेड चारिम आ दक्षिण अफ्रीकाक टेंबा बावुमा पांचम स्थान पर छथि।

भारतक रवींद्र जडेजा दू स्थान ऊपर चढ़ि छठम स्थान पर पहुंचि गेलाह। ऋषभ पंत छह स्थानक छलांग लगबैत सातम स्थान हासिल केने छथि। शुभमन गिल आठम, न्यूजीलैंडक डेरिल मिशेल तीन स्थानक छलांग लगबैत नवम आ पाकिस्तानक बाबर आजम दसमा स्थान पर छथि।