एसआईक पिस्टल छीनबाक सेहो कोशिश
शराबक सूचना पर पहुंचल छल पुलिस दल
बेगूसराय। बेगूसराय मे पुलिस टीम पर लाठी-डंडा आ चप्पल सं हमला कयल गेल। मारपीटक दौरान सब-इंस्पेक्टर (एसआई) कें पिस्टल सेहो छीनबाक कोशिश कयल गेल।
बताओल जा रहल अछि जे पुलिस टीम कें शराबक सूचना भेटल छल। एहि सूचनाक आधार पर छापेमारी करबाक लेल पुलिस पहुंचल छल। छापेमारीक दौरान पुलिस शराब तस्कर धर्मेंद्र कुमार कें गिरफ्तार कएलक तं स्थानीय लोक भड़कि उठल आ पुलिस टीम पर हमला कए देलक।
घटना बलिया थाना क्षेत्रक कमालपुर गामक अछि। एहि घटनाक एकटा वीडियो सेहो सामने आयल अछि। वीडियो मे देखाइत अछि जे महिला सभ सेहो पुलिस सं उलझि रहल अछि।
बलिया थाना मे पदस्थापित महिला पुलिस अवर निरीक्षक पल्लवी कुमारीक गश्तीक दौरान शराबक खरीद-बिक्रीक सूचना भेटलनि। एहि सूचनाक आधार पर धर्मेंद्र कुमारक शुभम टेंट हाउस दोकान मे छापेमारी कयल गेल, जतय शराबक कारोबार कयल जा रहल छल।
पल्लवी कुमारी, एसआई राहुल पासवान, एसआई विकास कुमार आ स्थानीय चौकीदार आरोपी धर्मेंद्र कुमार (40) के पकड़ि लेलनि। तकर बाद धर्मेंद्रक निशानदेही पर पुलिस टीम फूसक घर मे पहुंचल। एतय तलाशी लेल गेल तं 21 कार्टन अंग्रेजी शराब बरामद भेल।
धर्मेंद्र खगड़िया जिलाक महेशखूंट थाना क्षेत्रक बन्नी गामक रहनिहार अछि आ ससुरारि मे रहि टेंटक कारोबार करैत अछि।
पूछताछ मे आरोपी धर्मेंद्र कुमार स्वीकार कएलक जे ओ टेंट हाउसक कारोबारक आड़ि मे शराबक तस्करी करैत अछि। ओ पुलिस के ईहो बतौलक जे एक दिन पहिनहि शराबक खेप मंगौने छल।
शराब जब्त कए पुलिस धर्मेंद्र कुमार के थाना लए जा रहल छल, तखने गामक पुरुष आ महिला सभ पुलिसक गाड़ी के घेरि लेलक।
आरोपी के छोड़ेबाक आ जब्त शराब छीनबाक नीयत सं भीड़ पुलिस टीम पर लाठी-डंडा आ चप्पल सं हमला करय लागल। एसआई पल्लवी कुमारीक बयान पर बलिया थाना मे प्राथमिकी दर्ज कयल गेल अछि। एहि मे धर्मेंद्र कुमार आ 4 उपद्रवी के नामजद कयल गेल अछि, जखनकि 15 अज्ञात लोक के विरुद्ध शराब रखबाक आ बेचबाक आरोप मे मामिला दर्ज कयल गेल अछि।
