– सुरक्षा बढ़ेबाक मांग पर दिल्ली हाईकोर्टक फैसला
पटना, समदिया
पूर्णिया सांसद पप्पू यादवक सुरक्षा बढ़ेबाक मांगबला याचिका पर मंगलदिन दिल्ली हाईकोर्ट मे सुनवाइ भेल। न्यायालय केंद्र सरकार कें निर्देश देलक जे सांसद कें तत्काल अतिरिक्त पीएसओ (पर्सनल सिक्योरिटी ऑफिसर) उपलब्ध कराओल जाय। संगहि, हुनकर सुरक्षा बढ़ेबाक मांगबला आवेदन पर सेहो विचार करबाक निर्देश देल गेल।
नीट पेपर लीक आ श्रीराम जन्मभूमि तीर्थ क्षेत्र ट्रस्टक विरुद्ध संसद भवन परिसर मे प्रदर्शनक बाद पप्पू यादव कें जान सं मारबाक धमकी भेटल छल। एकर बाद ओ केंद्रीय गृह मंत्रालय कें सुरक्षा बढ़ेबाक लेल आवेदन देने छलाह। केंद्र सरकारक वकील आशीष दीक्षित न्यायालय कें कहलनि जे गृह मंत्रालय पप्पू यादवक आवेदन पर विचार कए रहल अछि आ तीन सप्ताहक भीतर निर्णय लेल जाएत। एहि पर पप्पू यादवक वकील कहलनि जे जं सांसद कें तत्काल अतिरिक्त सुरक्षा देल जाइत अछि, तं ओ याचिका आगू नहि बढ़ौताह।
दुनू पक्षक दलील सुनलाक बाद हाईकोर्ट आदेश देलक जे सुरक्षा बढ़ेबाक आवेदन पर निर्णय नहि होयबा धरि सरकार पप्पू यादव कें अतिरिक्त पीएसओ उपलब्ध कराओत। एकर संगहि न्यायालय याचिकाक निपटारा कए देलक। पूर्णिया सांसदक कहब अछि जे हुनका भेटल वाई श्रेणीक सुरक्षा एखन बिहार धरि सीमित अछि। एहि कारण दिल्ली अथवा देशक अन्य भाग मे संसदीय कर्तव्य निभेबाक दौरान हुनका पर्याप्त सुरक्षा नहि भेटैत अछि।
पप्पू यादवक अनुसार, 29 जुलाईक बाद हुनकर जानक खतरा बढ़ि गेल। हुनकर आधिकारिक वेबसाइटक माध्यम सं हुनका आ परिवार कें विस्फोट सं उड़ेबाक धमकी भेटल छल। एहि संबंध मे दिल्ली पुलिस मे शिकायत दर्ज कराओल गेल आ देशभरि मे सुरक्षा देबाक लेल गृह मंत्रालय कें आवेदन देल गेल।
हुनकर आरोप अछि जे नई दिल्लीक पंडारा रोड स्थित हुनकर पत्नी आ कांग्रेस राज्यसभा सांसद रंजीता रंजनक सरकारी आवासक बाहर किछु लोक जमा भए हुनका बाहर अनबाक आ जान सं मारबाक धमकी दैत नारा लगौने छल। पप्पू यादव इहो दावा कएलनि जे 3 अगस्त कें नई दिल्ली मे प्रेस वार्ताक दौरान हुनका पर हमला भेल छल। एहि मामिला मे तिलक मार्ग थाना मे एफआईआर दर्ज भेल अछि।
