- तीन सं चारि करोड़ टाकाक काज मे गड़बड़ीक आरोप
सहरसा नगर निगम मे सरकारी राशि दुरुपयोग, वित्तीय अनियमितता आ निविदाक शर्तक उल्लंघनक आरोपक जांच लेल नगर विकास एवं आवास विभागक चारि सदस्यीय उच्चस्तरीय टीम शुक्रदिन सहरसा पहुंचल। टीम नगर आयुक्तक कार्यालय मे संबंधित योजना आ निविदा सं जुड़ल संचिकाक गहन जांच शुरू कय देने अछि। आरोपक अनुसार, सहरसा नगर निगम मे नियमक उल्लंघन करैत योजना सभ कें 15 लाख टाका सं कम लागत मे खंड-खंड मे विभाजित कयल गेल, जाहि सं सरकारी धनक दुरुपयोग भेल। जांच टीमक पहुंचते नगर निगम परिसर आ अधिकारी-कर्मचारीक बीच हड़कंप मचि गेल। टीम तत्काल सभ आवश्यक दस्तावेजक पड़ताल शुरू कयलक, जाहि सं निगमक काजकाज मे पारदर्शिता सुनिश्चित कयल जा सकय। नगर आयुक्तक कार्यालयक बाद टीम हवाई अड्डाक लग स्थित पार्क आ अन्य स्थल सेहो निरीक्षण कयलक। ई कारबाइ बिहार सरकारक पूर्व मंत्री डॉ. आलोक रंजन द्वारा नगर विकास एवं आवास विभाग कें देल गेल विस्तृत परिवाद पत्रक आधार पर कयल गेल अछि। ओ अपन शिकायत मे निगमक विरुद्ध कतेको गंभीर आरोप लगौने छलाह। एकर अतिरिक्त शहरक विभिन्न चौक-चौराहा पर अवैध रूप सं टोल आ पार्किंग वसूली करेनाय तथा निविदाक शर्तक खुल्लमखुल्ला उल्लंघन करबाक आरोप सेहो अछि। जांच टीम विशेष रूप सं वर्ष 2026-27 लेल विभिन्न सैरातक बंदोबस्ती सं संबंधित संचिकाक पड़ताल कए रहल अछि। एहि मे पटेल मैदान स्थित निर्माणाधीन पार्क, वार्ड संख्या-13 स्थित आई.डी. सिंह चौकक लग जीर्णोद्धार कार्य तथा शाहपुर गाम स्थित पार्क निर्माण आ पोखर जीर्णोद्धार योजना शामिल अछि। एकर संगहि वर्तमान नगर आयुक्त प्रभात कुमार झाक प्रभार ग्रहण करबाक तिथि सं आब धरि जारी सभ कार्यादेश सं संबंधित योजनाक सूची आ मूल संचिकाक सेहो गहन जांच कयल जा रहल अछि। विभाग द्वारा गठित एहि चारि सदस्यीय जांच दल मे संयुक्त सचिव संजय कुमार (अध्यक्ष), अवर सचिव परमानंद पांडेय (सदस्य), अधीक्षण अभियंता हरेंद्र उपाध्याय (सदस्य) आ सहायक अभियंता अखिलेश कुमार (सदस्य) शामिल छथि। जांच दल सभ अभिलेख आ जमीनी वास्तविकताक जांच कए 15 दिनक भीतर स्पष्ट मंतव्यक संग अपन विस्तृत जांच प्रतिवेदन विभाग कें सौंपत। प्रतिवेदनक आधार पर दोषी पाओल जायवला कर्मचारी आ संवेदक पर कड़ा विभागीय आ कानूनी कारबाइक संभावना जताओल जा रहल अछि।
