राहुल गांधी देलनि धरना तं पैलेट गन मामिला मे पुलिस केलक एफआइआर

 

 

• नेता प्रतिपक्ष कहलनि, सत्यक भेल जीत

 

नई दिल्ली, एजेंसी

लोकसभा मे नेता प्रतिपक्ष राहुल गांधीक जिदक बाद आखिर दिल्ली पुलिस पैलेट गन मामिला मे पीड़ित साहिल लोचबक शिकायत पर एफआइआर दर्ज कए लेलक अछि। दिल्ली पुलिसक सूत्र एहि बातक जानकारी देलनि। वरिष्ठ पुलिस अधिकारीक अनुसार 20 जुलाई कें जंतर-मंतर पर भेल विरोध प्रदर्शनक दौरान कथित रूप सं पैलेट गनक प्रयोगक मामिला मे एफआइआर दर्ज कएल गेल अछि। एहि मामिला मे केओ नामजद नहि अछि, अर्थात अज्ञात लोकक विरुद्ध एफआइआर दर्ज भेल अछि। एफआइआर दर्ज भेलाक बाद राहुल गांधी एकरा सत्यक जीत बतौलनि। ओ कहलनि जे न्याय दिस ई पहिल डेग अछि।

एहि सं पहिने राहुल गांधी साहिल लोचब, हुनकर परिवारक सदस्य आ वकील सभक संग संसद मार्ग थाना पहुंचल छलाह। ओ मामिला मे प्राथमिकी दर्ज करबाक संग पुलिस सं जांच अधिकारीक फोन नंबर उपलब्ध करबाक मांग कएलनि। हुनकर कहब छल जे 19 वर्षीय छात्र साहिल लोचब पर पैलेट गनक प्रयोगक मामिला मे जखन धरि प्राथमिकी दर्ज नहि होयत, तखन धरि ओ ओतय सं नहि हटताह। राहुल गांधीक आरोप अछि जे 20 जुलाई कें कनॉट प्लेस मे प्रदर्शन करैत छात्र सभ पर पैलेट गन चलाओल गेल। हुनकर लग एहि घटनाक ठोस प्रमाण अछि आ दोषी सभक विरुद्ध कारबाइ लेल प्राथमिकी दर्ज होयब जरूरी अछि।

राहुलक संग कांग्रेसक वरिष्ठ नेता सभ सेहो

राहुल गांधी शुक्रदिन संसद मार्ग थाना मे बहिन प्रियंका गांधी सहित कांग्रेसक कतेको वरिष्ठ नेता संग धरना पर बैसलाह। डीसीपी कार्यालयक बाहर देल गेल धरना मे कांग्रेस महासचिव प्रियंका गांधी, जयराम रमेश, मुकुल वासनिक, कुमारी सैलजा, वरिष्ठ नेता सलमान खुर्शीद सहित कतेको नेता शामिल भेलाह। धरना शुरू भेलाक बाद संसद मार्ग थाना बाहर कांग्रेस कार्यकर्ता सभक भीड़ जुटि गेल। कार्यकर्ता सभ प्रधानमंत्री नरेंद्र मोदी आ गृह मंत्री अमित शाहक विरुद्ध नारा लगौलनि।

राहुल गांधी की आरोप लगौलनि?

राहुल गांधी एक्स पर पोस्ट कए कहलनि जे ओ साहिल लोचबक संग पुलिसक कथित बर्बरताक विरुद्ध प्राथमिकी दर्ज करयबाक लेल संसद मार्गक डीसीपी कार्यालय पहुंचल छथि। ओ आरोप लगौलनि जे 20 जुलाई कें जंतर-मंतर पर शांतिपूर्ण प्रदर्शन करैत साहिल पर पुलिस पैलेट गनक इस्तेमाल कएलक, जाहि सं ओ गंभीर रूप सं घायल भए गेलाह आ हुनकर एकटा आंखिक रोशनी पर संकट अछि। राहुल गांधीक अनुसार शांतिपूर्ण प्रदर्शनकारीक विरुद्ध एहन कारबाइ गंभीर अपराध अछि। हुनकर कहब अछि जे साहिल न्याय लेल प्राथमिकी दर्ज कराबय चाहैत छथि, मुदा हुनका एहन करय नहि देल जा रहल छल।

(पेज 11 सेहो देखी)