राज्यपाल सं भेंट कए बाहर निकलल तेजस्वी कहलनि, लोकतंत्रक हत्यारा छथि ज्ञानेश
पटना, समदिया
निर्वाचन आयोग आ विशेष गहन पुनरीक्षण (एसआइआर) केर विरोध मे महागठबंधनक घटक दल सभ बृहस्पति कें पटना मे प्रदर्शन केलक। प्रदर्शनकारी सभ कें रोकबाक लेल पुलिस दिस सं बैरिकेडिंग कएल गेल छल। एहि क्रम मे नेता प्रतिपक्ष तेजस्वी यादव बैरिकेड पर चढ़ि गेलाह। किछुए काल बाद कार्यकर्ता सभ बैरिकेड तोड़ि आगू बढ़ि गेलाह। एहि क्रम मे पुलिसक संग धक्का-मुक्की सेहो भेल।
राज्यपाल सं भेंट कए बाहर निकलल तेजस्वी यादव कहलनि जे ज्ञानेश कुमार कें मुख्य निर्वाचन आयुक्त कहबा मे शर्म होइत अछि। ज्ञानेश कुमार लोकतंत्रक हत्यारा आ महाचोर छथि। सभ सं बेसी जरूरी अछि जे मोदी जी आ अमित शाह कें हटाओल जाए। ओ कहलनि जे देशक लोकतंत्र कोइ समाप्त नहि कए सकैत अछि। हुनकर अनुसार, एसआइआरक शुरुआत बिहार सं भेल छल आ आब देशक जनता निर्वाचन प्रक्रियाक कथित बेईमानी बुझि गेल अछि। तेजस्वी कहलनि जे हुनकर राहुल गांधी सं बात भेल अछि आ दिल्ली मे प्रदर्शन लेल निमंत्रण भेटल अछि। महागठबंधनक नेता सभ राष्ट्रपति भवन सेहो जेताह। झारखंड मे सेहो महागठबंधनक लोक प्रदर्शन मे शामिल छथि।
तेजस्वी कहलनि जे गोली आ जेल सं हम सभ डरयबला नहि छी। जे कुर्बानी देबय पड़त, से देब। ओ राज्यपाल कें सीवान मे एके-47 सं भेल फायरिंगक जानकारी देबाक बात सेहो कहलनि। एहि क्रम मे हुनकर पुलिस प्रशासनक रवैया पर सेहो सवाल छल। ओ कहलनि जे शांतिपूर्ण प्रदर्शनक लेल समय लेल गेल छल, तखन बैरिकेडिंग करबाक जरूरत की छल।
तेजस्वी आरोप लगौलनि जे प्रशासनक रवैया तानाशाहीपूर्ण छल आ पुलिस एके-47 सहित तैनात छल। एहि क्रम मे सचिवालय क्षेत्रक एसडीपीओ डॉ. अन्नू कुमारी तेजस्वी यादव आ प्रदर्शनकारी सभ कें आगू बढ़य सं रोकबाक प्रयास कएलनि, मुदा ओ सफल नहि भेलीह आ तेजस्वी आगू बढ़ि गेलाह। ओहि बीच कांग्रेसक प्रदेश अध्यक्ष राजेश राम हाथ मे हथकड़ी लगौने आ संविधानक प्रति लए प्रदर्शन मे शामिल भेलाह। कांग्रेसक दिस सं एहि दिन कें काला दिवसक रूप मे मनाओल जा रहल अछि। प्रदर्शनक दौरान एक कचौड़ी, दू समोसा, कोना करय देश भरोसा आ ज्ञानेश कुमार कतय भेटताह, बीजेपीक कोरा मे सन नारा लगाओल गेल।
डॉ. अन्नू कुमारी पटना सचिवालय क्षेत्रक एसडीपीओ छथि। ओ 63म बीपीएससी परीक्षा उत्तीर्ण कए वाणिज्य कर विभाग मे सहायक आयुक्त बनल छलीह। बाद मे 64म बीपीएससी परीक्षा उत्तीर्ण कए बिहार पुलिस सेवा मे डीएसपी बनलीह। अपन कड़क आ बेबाक कार्यशैलीक कारण हुनकर पहचान लेडी सिंघमक रूप मे बनल अछि। एहि सं पहिने बीपीएससी अभ्यर्थीक प्रदर्शन, राबड़ी आवास पर भेल हलचल सहित कतेको मामिला मे ओ चर्चित रहल छथि।
