अनुमंडलीय अस्पताल मे प्राथमिक उपचारक बाद कएल गेल रेफर
पेट मे लागल दू गोली, हालति चिंताजनक
मधुबनी, समदिया
जयनगर अनुमंडल क्षेत्रक कमला रोडक लग पूर्व सं घात लगौने बाइक सवार अपराधी सभ किराना व्यवसायी कें गोली मारि घायल कए देलक आ रुपैया सं भरल थैली लए कए फरार भए गेल। घायल व्यवसायीक पहचान जयनगर निवासी टिंकू महतो (लगभग 42 वर्ष) केर रूप मे भेल अछि। घायल व्यवसायी कें स्थानीय लोकक सहयोग सं जयनगर अनुमंडलीय अस्पताल मे भर्ती कराओल गेल, जतय प्राथमिक उपचारक बाद गंभीर स्थिति कें देखैत मधुबनी रेफर कएल गेल। सदर अस्पताल सं सेहो नीक इलाज लेल मधुबनी क्रिब्स हॉस्पिटल रेफर कएल गेल, जतय सं चिकित्सक सभ दरभंगा पारस अस्पताल रेफर करबाक सलाह देलनि। कहल जा रहल अछि जे व्यवसायीक पेट मे दू गोली लागल अछि आ हुनकर स्थिति चिंताजनक अछि। घटनाक सूचना भेटिते जयनगर एसडीपीओ सदानंद कुमार, इंस्पेक्टर सह थानाध्यक्ष रमन कुमार सहित पुलिस बल घटनास्थल पर पहुंचल। पुलिस घटनास्थल सं एकटा जिंदा गोली आ खाली खोखा बरामद कएलक। घटना राति करीब 10 बजकर 22 मिनट पर भेल बताओल जा रहल अछि। पुलिस घटनास्थलक आसपास लगाओल गेल सीसीटीवी कैमरा केर फुटेज खंगालि रहल अछि। पुलिसक अनुसार सीसीटीवी फुटेज मे अपराधीसभक चेहरा आ घटना कें अंजाम दैत दृश्य कैद भेल अछि। फुटेजक आधार पर अपराधीक पहचान आ गिरफ्तारी लेल कारबाइ तेज कएल गेल अछि। जयनगर एसडीपीओ सदानंद कुमार घटना संबंधी सूचना वरिष्ठ पुलिस पदाधिकारी कें देलनि। सूचना पाबि मधुबनी सं एसएसपी योगेंद्र कुमार आ ग्रामीण एसपी शिवम धाकड़ जयनगर पहुंचि घटनास्थलक बारीकी सं निरीक्षण कएलनि। एसएसपी योगेंद्र कुमार एकटा विशेष टीम गठित कए अपराधी सभ कें शीघ्र सं शीघ्र गिरफ्तार करबाक निर्देश देलनि।
