डीएम कएलनि सोलर मेलाक शुभारंभ
ऑन-द-स्पॉट रजिस्ट्रेशनक सुविधा, 3 किलोवाट धरि 78 हजार टाका सब्सिडी
सहरसा, समदिया
प्रधानमंत्रीक महत्वाकांक्षी पीएम सूर्य घर मुफ्त बिजली योजनाक व्यापक प्रचार-प्रसार आ सौर ऊर्जाक प्रति आम लोक कें जागरूक करबाक उद्देश्य सं शुक्रदिन स्थानीय विकास भवन मे विद्युत विभागक दिस सं भव्य सोलर मेलाक आयोजन कएल गेल। मेलाक उद्घाटन जिलाधिकारी दीपेश कुमार दीप प्रज्वलित कए कएलनि। कार्यक्रम मे पैघ संख्या मे बिजली उपभोक्ता, जनप्रतिनिधि, स्वयं सहायता समूहक सदस्य, विद्यार्थी, उद्यमी आ मीडिया प्रतिनिधि सहभागी भेलाह। कार्यक्रम मे अधिकारी सभ जानकारी देलनि जे एहि योजनाक अंतर्गत पात्र परिवार अपन घरक छत पर रूफटॉप सोलर प्लांट लगा कए बिजली उत्पादन कए सकैत छथि। एहि सं बिजली बिल मे उल्लेखनीय कमी आओत तथा अतिरिक्त बिजली ग्रिड मे पठा कए आर्थिक लाभ सेहो प्राप्त कएल जा सकैत अछि। मेला मे लगाओल गेल विभिन्न स्टॉल पर विशेषज्ञ सभ सोलर पैनलक कार्यप्रणाली, रखरखाव, सुरक्षा मानक, ऑनलाइन आवेदनक प्रक्रिया, पात्रता, आवश्यक दस्तावेज आ सरकारी अनुदानक संबंध मे विस्तृत जानकारी देलनि। उप विकास आयुक्त गौरव कुमार बेसी सं बेसी लोक कें योजनाक लाभ लेबाक अपील कएलनि।
विद्युत कार्यपालक अभियंता अमित कुमार आ एसटीएफक कार्यपालक अभियंता प्रशांत कुमार उपभोक्तासभक तकनीकी आ वित्तीय जिज्ञासाक समाधान कएलनि। मेलाक खास विशेषता ऑन-द-स्पॉट रजिस्ट्रेशनक सुविधा रहल, जाहि सं इच्छुक उपभोक्ता मौके परे आवेदनक प्रक्रिया शुरू कए सकलाह। अधिकारी सभ बतौलनि जे योजनाक अंतर्गत 1 किलोवाटक सोलर संयंत्र पर 30 हजार टाका, 2 किलोवाट पर 60 हजार टाका तथा 3 किलोवाट अथवा एकरा सं बेसी क्षमताक सोलर संयंत्र पर 78 हजार टाका धरि सब्सिडी देल जा रहल अछि। एकर अतिरिक्त करीब 7 प्रतिशत ब्याज दर पर 2 लाख टाका धरि ऋणक सुविधा सेहो उपलब्ध अछि।
कार्यक्रमक अंत मे विद्युत विभाग सभ प्रतिभागीक प्रति आभार व्यक्त कएलक। विभाग विश्वास व्यक्त कएलक जे एहि पहल सं जिला मे स्वच्छ आ हरित ऊर्जाक उपयोग कें बढ़ावा भेटत तथा लोकक बीच सौर ऊर्जाक प्रति जागरूकता सेहो बढ़त।
========================================================================
