सहरसा, समदिया
जिला स्तरीय तीन दिवसीय विद्यालय खेलकूद प्रतियोगिताक समापन बृहस्पति कें भेल। एहि दौरान पुलिस लाइन मैदान, पटेल मैदान, जिला स्कूल मैदान, इंडोर स्टेडियम आ खेल भवनक व्यायामशाला मे एक संग विभिन्न खेल प्रतियोगिता आयोजित कएल गेल। तीन दिन धरि चलल प्रतियोगिता मे जिलाक विभिन्न प्रखंड सं आएल छात्र-छात्रा सभ अपन प्रतिभा आ खेल कौशलक प्रदर्शन केलनि। जिला खेल पदाधिकारी कहलनि जे प्रतियोगिताक 23 खेल विधा मे उत्कृष्ट प्रदर्शन कएनिहार खिलाड़ीसभक चयन प्रमंडल स्तरीय प्रतियोगिता लेल कएल गेल अछि। ओ कहलनि जे प्रमंडलीय प्रतियोगिताक लेल चयनित खिलाड़ीसभक नीक तैयारी कराओल जाएत, जाहि सं ओ सभ आत्मविश्वासक संग अपन प्रदर्शन कए सकथि। जिला प्रशासन खेलाड़ी सभ कें आगू बढ़बाक लेल हरसंभव सहयोग करत। प्रतियोगिता मे फुटबॉल, हैंडबॉल, रग्बी, एथलेटिक्स, कबड्डी, खो-खो, शतरंज, बैडमिंटन, योग, वेटलिफ्टिंग, कुश्ती आ हॉकी सहित विभिन्न खेलक आयोजन भेल। अलग-अलग खेल विधा मे छात्र-छात्रा सभ उत्साहक संग भाग लैत अपन खेल प्रतिभाक प्रदर्शन केलनि। प्रतियोगिताक सफल संचालन मे कार्यपालक सहायक राहुल कुमार, शारीरिक शिक्षा शिक्षक मनोरंजन कुमार सिंहक संग रोशन कुमार सिंह, धोनी, प्रमोद कुमार झा, शशि भूषण, समी अहमद, नीतीश मिश्रा, महेश कुमार, तुषार कात्यान आ अमरिंद कुमार अमरक महत्वपूर्ण योगदान रहल।
