- आय सं अधिक संपत्ति मामिला मे कएल गेल कारबाइ
पूर्वी चंपारण, समदिया
आय सं बेसी संपत्ति अर्जित करबाक मामिला मे आर्थिक अपराध इकाई (ईओयू), पटनाक टीम मंगलदिन केसरिया नगर पंचायतक पूर्व मुख्य पार्षद आ भाजपा नेता रजनीश कुमार पाठक उर्फ रिंकू पाठकक 6 ठाम एकहि संग छापामारी कयलक। रिंकू पाठक वर्तमान मे वार्ड पार्षद छथि आ नगर पंचायतक मुख्य पार्षद किरण देवीक पति छथि।
छापामारीक नेतृत्व ईओयू केर एएसपी परमिंदर भारती कए रहल छलाह। टीम मे 4 डीएसपी सहित कुल 32 अधिकारी शामिल छलाह। ईओयू सूत्रक अनुसार, रजनीश पाठक आ हुनकर पत्नी किरण देवी पर आय सं बेसी संपत्ति अर्जित करबाक आरोप अछि। एहि मामिला मे आर्थिक अपराध थाना कांड संख्या 29/26 अंतर्गत प्राथमिकी दर्ज अछि।
प्रारंभिक जांच मे दंपत्तिक ज्ञात आयक तुलना मे करीब 3 करोड़ 56 लाख 65 हजार 118 टाकाक बेसी संपत्तिक साक्ष्य भेटबाक बात कहल गेल अछि। ई राशि ज्ञात आय सं करीब 124.81 प्रतिशत बेसी बताओल गेल अछि। भ्रष्टाचार निवारण अधिनियम, 1988 (संशोधित 2018) अंतर्गत कारबाइ कयल जा रहल अछि।
केसरिया सं दानापुर धरि तलाशी
ईओयू टीम केसरिया बाजार स्थित निजी आवास, युवराज गैस एजेंसीक कार्यालय आ गोदाम तथा नगर पंचायत भवन स्थित मुख्य पार्षद कार्यालय मे तलाशी लेलक। पटनाक दानापुर स्थित बालाजी नगरक पार्क वेस्ट अपार्टमेंटक फ्लैट बी-101 सहित अन्य ठामो जांच कयल गेल। अधिकारी सभ दस्तावेज आ संपत्ति सं जुड़ल पेपरक जांच करैत रहलाह। तलाशी मे की-की भेटल, एकर आधिकारिक जानकारी एखन नहि देल गेल अछि।
ओमहर, रिंकू पाठक छापामारी कें विरोधी सभक षडयंत्र बतौलनि। हुनकर कहब छनि जे अधिकारी हुनकर ओतय सं 2 लाख टाका नगद आ किछु जमीनक पेपर लए गेलाह। हुनकर अनुसार, ई टाका गैस गोदामक छल। जांच पूरा भेलाक बादे मामिलाक स्थिति स्पष्ट होयत।
