कतेको ठाम पानि घुसल
पटना। बिहार मे एहि वर्ष एखन धरि सामान्य सं कम बरखा भेल अछि, मुदा राज्यक प्रमुख नदी सभ उफान पर अछि। गंगा, सोन, कोसी, गंडक, सरयू आ बागमतीक बढ़ैत जलस्तर सं कतेको जिला मे बाढ़िक खतरा बढ़ि गेल अछि। पटना, भोजपुर, बक्सर, सिवान, रोहतास, भागलपुर, बेगूसराय आ पश्चिमी चंपारण मे नदीक किनार पर रहनिहार लोकक चिंता बढ़ि गेल अछि।
रोहतास मे शुक्रदिन नौहट्टा क्षेत्र मे सोनक जलस्तर अनचोके बढ़ि गेल। पहाड़ी नदी सभक पानि रोहतास-यदुनाथपुर मुख्य मार्ग पर तीन सं चारि फीट धरि बहय लागल, जाहि सं आवागमन बाधित भए गेल।
गंगा नदीक जलस्तर मे लगातार वृद्धि होयबाक कारण शाहपुर प्रखंडक दियारा इलाका मे बाढ़िक खतरा गहिर भए गेल अछि। गंगाक पानि सहायक नदी आ धारक माध्यम सं खेतक बाद आब गाम दिस तेजी सं पसैर रहल अछि।
लक्षुटोला, लालू डेरा, बहोरनपुर, सुहिया आ दामोदरपुर पंचायतक कतेको गाम मे बाढ़िक पानि पहुंचि गेल अछि। लक्षुटोला पंचायतक लक्षुटोला गामक वार्ड संख्या 13 आ 14 मे गंगाक पानि घर मे प्रवेश करय लागल अछि।
सिवानक दरौली मे सरयू नदीक जलस्तर 61.11 मीटर दर्ज कएल गेल, जे खतराक निशान 60.82 मीटर सं 29 सेंटीमीटर ऊपर अछि। नदीक पानि सोहागरा, सोनहुला, श्रीकलपुर, गुठनी, बलुआ आ तीर बलुआ सहित कतेको निचला इलाका मे पहुंचि गेल अछि। आंदर, रघुनाथपुर आ सिसवन मे सेहो नदीक जलस्तर लगातार बढ़ि रहल अछि।
बक्सर मे पछिला चारि दिन मे गंगाक जलस्तर करीब 4.5 मीटर बढ़ि चुकल अछि। शुक्रदिन पानि करीब दू सेंटीमीटर प्रति घंटाक गति सं बढ़ल। दियारा क्षेत्रक संग चौसाक मैदानी इलाका मे सेहो पानि पहुंचय लागल अछि। रामरेखा घाट स्थित विवाह मंडप मे पानि घुसि गेल अछि। घाट सभ पर बैरिकेडिंग कए स्नानार्थी सभ कें नदी दिस जाए सं रोकल जा रहल अछि।
भागलपुर मे गंगाक जलस्तर एक सेंटीमीटर प्रति घंटाक गति सं बढ़ि रहल अछि। शुक्रदिन सांझ छह बजे जलस्तर 32.49 मीटर दर्ज कएल गेल, जखनकि चेतावनी स्तर 32.68 मीटर अछि। अर्थात नदी चेतावनी स्तर सं मात्र 19 सेंटीमीटर नीचां अछि। बरारी, रजंदीपुर, फरका, बाबूपुर, घोषपुर आ ममलखा सहित कतेको दियारा क्षेत्रक खेत मे पानि पसैर गेल अछि।
पश्चिमी चंपारणक रेवहिया गाम मे गंडक नदीक कटाव सेहो भीषण रूप लए लेने अछि। करीब 500 मीटर पक्की सड़क नदी मे समा गेल अछि। प्राथमिक विद्यालय चिउरही उर्दू केर भवन, चहारदीवारी आ पैक्स गोदाम पहिने सं कटावक भेंट चढ़ि चुकल अछि।
मुंगेर मे गंगाक जलस्तर चेतावनी स्तरक नजदीक अछि। संभावित बाढ़ि कें देखैत आपदा विभाग प्रभावित इलाका सं लोक सभ कें सुरक्षित ठाम पहुंचेबाक लेल नावक व्यवस्था कएलक अछि। तटीय इलाका मे रहनिहार लोक सभ कें सतर्क कएल गेल अछि।
नेपाल आ मध्य प्रदेशक ऊपरी जलग्रहण क्षेत्र मे भेल बरखाक असर बिहारक नदी सभ पर पड़ि रहल अछि। केंद्रीय जल आयोग गंगा, सोन, गंडक आ अन्य नदी सभक जलस्तर पर लगातार नजरि रखबाक सलाह देलक अछि। आबय बला दिन मे जलस्तर बढ़बाक आशंका कें देखैत प्रशासन कें सतर्क राखल गेल अछि।
