आटा सेहो बढ़ेलक चिंता
पटना। त्योहारी मौसिम शुरू होय सं पहिने महंगाई आम परिवारक चिंता बढ़ा देने अछि। राजधानी पटना मे चीनीक दाम बढ़लाक बाद आब प्याजक कीमत सेहो तेजी सं बढ़ल अछि। खुदरा बाजार मे चीनी 65 सं 70 रुपैया आ प्याज 45 सं 50 रुपैया किलो धरि पहुंचि गेल अछि।
खुदरा दुकानदार महासंघक महासचिव रमेश तलरेजा केर अनुसार, पटना मे चीनीक करीब 25 प्रतिशत आपूर्ति चंपारण सं होइत अछि। जखनकि 60 सं 65 प्रतिशत चीनी उत्तर प्रदेश आ महाराष्ट्र सं अबैत अछि। मांग आ आपूर्ति मे भेदक असर आब सीधा बाजार भाव पर देखाइ पड़ि रहल अछि।
चीनी आ प्याजक संग आटाक कीमत सेहो घरेलू बजट कें प्रभावित कए रहल अछि। आटाक दाम मे 5 सं 10 रुपैया प्रति किलो धरि बढ़ोतरी बताओल जा रहल अछि। एखन 5 किलो आटाक पैकेट करीब 250 रुपैया मे बिकि रहल अछि।
त्योहारक दौरान मिठाइक मांग बढ़बाक संभावना अछि। कारोबारी सभक अनुसार, चीनी महंग होयबाक सीधा असर मिठाइ बनेबाक लागत पर पड़ि सकैत अछि। जं कच्चा मालक कीमत मे कमी नहि भेल तं रक्षाबंधनक दौरान ग्राहक सभ कें मिठाइ लेल बेसी कीमत चुकाबय पड़ि सकैत अछि।
आलू-प्याज कारोबारी सभक अनुसार, पटना मे एखन प्याजक मुख्य आवक नासिक सं भए रहल अछि। आवक घटलाक कारण थोक भाव मे तेजी आयल अछि। मंगलदिन प्याज करीब 4,400 रुपैया प्रति क्विंटल धरि पहुंचि गेल छल, जखनकि गुरुदिन भाव करीब 4,000 रुपैया प्रति क्विंटल रहल।
कारोबारी सभक कहब अछि जे बाहर सं प्याजक आवक बढ़ला पर कीमत मे नरमी आबि सकैत अछि। मुदा एखन चीनी आ प्याजक बढ़ल भाव त्योहार सं पहिने आम परिवारक बजट बिगाड़ि देने अछि।
आबयबला दिन मे मांग बढ़लाक बाद खाद्य सामग्रीक कीमत पर आरो दबाव पड़बाक आशंका अछि।
